Yn ïakhun Final ka ‘Tariang FC pyrshah ïa ka Umsalait SC’ ha ka phutbol ha Pdengshakap
![](https://mawphor.com/wp-content/uploads/2023/03/pdengshakap.jpg)
Jowai, Lber 20 : Ka Dorbar Shnong Pdengshakap kaba pynïaid ïa ka Jingïalehkai phutbol jong ka ïa kaba la tip kum ka 9th Secondary School Football Knock-Out Tournament, 2022-23, ha kane ka sngi Saitjaiñ ba la dep kala ïoh ban pynïalehkai ïa ka Semi-Final ba ar hapdeng ka Umsalait SC pyrshah ïa ka One Soul United (Pdengkarong).
Ha kane ka jingïakhun na ka liang ka Umsalait SC kala jop ïa ka One soul Utd (Pdengkarong) da 5-1 kol.
Ka jingïalehkai hapdeng kine ki ar kynhun kala long kaba kham noh shilliang ha kaba ka Umsalait SC kala ïoh nyngkong ban pynkhih ïaka jar lyngba u Arnes Marwein ha ka minit ba 7, la pynbud pat sa u Phrangki Buam uba la khyrwit lai kol marwei ha ka minit kaba 37, 44, 63 bad ïaka kol kaba khadduh la thep da u Bhaki Rymbai ha ka minit kaba 87. Katba ïa ka shikol jong ka One Soul Utd (Pdengkarong) pat la thep da u Marshial Nongrum haka minit kaba 63.
La pyntip ba na ka liang jong ka Tournament Committee ka pynbna ba ka jingïalehkai final kan long haka 1 tarik Ïaïong 2023, hapdeng ka Tariang FC pyrshah ïaka Umsalait SC haka por 1 baje nohphai sngi.
Sa shisien la khot bad wer lang ïa baroh ki pait riew ieit phutbol jong ka thaiñ bad na kiwei de ban wan sakhi lang ïa kane ka jingialehkai Final. Pynkut ka kyrwoh bala phah da u Sports Secretary bah Oriswell Khyriem.