Nongstoiñ, Nailar 25 : Ha ka sngi National Sports Day, ka Mera Yuva Bharat (MY Bharat) Nongstoiñ, ha ryngkat bad ka National Service Scheme (NSS), kan pynlong ïa ka prokram ‘Khelo India Samvad’ ha ka 27 tarik Nailar ha ar tylli ki skul bah kiba kongsan ha ka distrik, kata ha Nongstoiñ College bad St. Francis D’Assisi College.
Ka mat kaba kongsan jong kane ka prokram kan long ka jingïakren lyngba ka video conference jong u Myntri Rangbah duh ka Ri, u Shri Narendra Modi bad ki samla na kylleng ka ri. Bun ngut ki samla kin ïashimbynta ha kane ka prokram bad kin sngap ïa ka jingkren jong u Myntri Rangbah Duh lyngba ki prokram kiba pynlong ha kylleng ka ri.
Kum shi bynta jong ka Khelo India Samvad, ki samla kin ïoh ïa ka lad ban ïakren bad ki nongïalehkai na ka thaiñ bad ki samla kiba dang ïoh nam ha ki jingïalehkai. Ka jingïakren kan pynleit jingmut halor ka jingïashem jong ki nongïalehkai, ki lad ki lynti kiba don ha ka liang ki jingïalehkai, kumno ban pynroi ïa ka sports ecosystem bad ka sports infrastructure ha India ha kine ki snem ba la leit.
U Deputy Director Kashish Jethwani u la ong ba ka thong kaba kongsan jong kane ka prokram ka long ban pynïajan ïa ki samla bad ki jingïalehkai, ka jingïalam jong ki samla bad ka jingtei ïa ka ri.
Ha ka jingïakren bad ki samla, yn pan ïa ki jingmut bad ki jingsngew jong ki halor ki mat kiba kongsan kum ka pynkhlaiñ ïa ka sports ecosystem, ka jingpynkhreh ïa ki nongïalehkai na ka bynta ki Olympic Games 2036, ka jingpynbun ïa ka jingïashimbynta jong ki samla ha ka jingïalam bad ka governance, ban pynkhlaiñ ïa ki samla na ka bynta ka Viksit Bharat.
U la ong ruh ba ki samla ki lah ban phah ïa ki jingmut, ki jingai jingmut bad ki jingangnud jong ki lyngba ka Suggestion Box kaba don ha ka portal Mera Yuva Bharat. Ki jingai jingmut kiba wan na ki samla yn pynïasoh bad ki thong jong kane ka prokram, khnang ba ka jingïashimbynta jong ki kan long kaba don jingmut bad kaba seisoh.
Ha kane ka prokram, yn kyntu ruh ïa ki samla ban ïashim bynta ha ka VBYLD Quiz Competition. Ki Mera Yuva Bharat volunteers, ki NSS volunteers bad ki samla na ka thaiñ kin ïashimbynta da kaba shitrhem ha kane ka jingpynlong.
