Shillong, Nailur, 17: Ka National Career Service Centre for Differently Abled, Shillong kan sdang ïa ka jingai jinghikai ha ka Computer Application bad ka jingmaramot ïa ki mar elektrik bad kiwei kiwei ki tiar ba pyndonkam ha ki ïing. Kane ka jingai jinghikai kaba ym donkam ban siew ka dei na ka bynta kito kiba don jingduna ha ki dkhot met kiba don jingduna ha ki shyieng, kiba tlot ka bor ïohi, ka bor ïohsngew, kiba kham suki ka bor pyrkhat, kiba bun ki jait jingduna dkhot met bad kito kiba la jem na ka jingpang niangthohlieh.
Kane ka prokram ai jinghikai ka dei kaba naduh hynriew bnai haduh shi snem. Ha kane ka por ba dang ïoh jinghikai, ki shah hikai kin ïoh ka stipend kaba T. 2,500/- ha ka shi bnai lyngba ka rukom ai jingsiew DBT. Kito kiba kwah ban ïashim bynta ha kane ka prokram ki dei ban ai ka bio-data jong ki ha ryngkat kiwei kiwei ki kot ki sla kum ka jingpynshisha ïa ka kyrdan pule jong ki, ka jingpynshisha ba ki don jing duna ha ki dkhot met, Aadhar card, caste certificate, ka dur passport bad ki jingtip shaphang ki bank account jong ki sha ka ophis kaba don ha Keating Road shuwa lane haduh ka 30 tarik u Nailur 2023.
Ka National Career Service Centre for Differently Abled (kaba ju long mynshuwa ka VRC) ka dei ka ophis hapoh ka Directorate General of Employment (DGE), hapoh ka tnat Labour & Employment, ka Sorkar India bad ka trei na ka bynta ka bha ka miat jong ki briew kiba don jingduna ha ki dkhot met lyngba ki jingïasyllok, ki jingpeit, ki jingai jinghikai khnang ban ïoh lad kamai jakpoh, bad ruh kiwei kiwei ki kam khnang ban kyntiew ïa ki. ïa ki kam ha Meghalaya la sdang naduh u Risaw 2022.
