Yn her Delhi ka KHADC ban kynduh ïa u Amit Shah halor ka jingpynbeit thymmai ïa ka 6th Schedule

Shillong, Naitung 18 : Baroh ki heh jong ka KHADC kynthup naduh u CEM, Deputy CEM, Chairman bad kumjuh u Nongïalam ka Liang Pyrshah ki pynkhreh mynta ban leit sha nongbah Delhi ban kynduh ïa ka tnad Kampohiing ka Ri khamtam eh lada ïohlad wat ïa u Myntri katei ka tnad, u Amit Shah ban ïakren halor ka phang kaba ïadei bad ka jingpynbeit thymmai ïa ka Khyrnit ba Hynriew jong ka Riti Synshar jong ka Ri.

Ïa kane la ïathuh da u Deputy CEM, Bah Pynshngaiñ N Syiem haba kren bad ki lad pathai khubor hadien ba la wai ka jingïalang ba kyrkieh jong baroh ki MDC haba ïadei bad katei ka jingtyrwa pynkylla thymmai ïa ka Khyrnit ba Hynriew.

La ïathuh ba ka mat pdeng jong katei ka jingkynduh ka long da ka jingkhmih lynti ba ïoh kumno re kumno ka sorkar pdeng kan wanrah ïa katei ka mat kaba ïadei bad ka Khyrnit ba Hynriew ha kane ka Dorbar Lyiur ha Parliament.

“Ha kine ki khyndiat sngi ngin sa leit ba kynduh ïa ki Ophisar ka tnad Kampohiing ka Ri bad lada ïoh lad ïa u Myntri ka tnad Kampohiing ka Ri, u Amit Shah ban pynsngew ïa ki mat kiba donkam,” u la ong.

Nalorkata, u la ong ruh ba kumba long haduh mynta ki district council ha ka jylla kim ju ïoh ïa ka jingkyrshan  kaba man ka por na ka sorkar pdeng, namar kine ki jaka treikam kim hap hapoh ka Article 280, kaba dei na ka bynta ki Municipal bad ki Panchayat.

Tangba u ong pat ba mynta ka  district council ka ïoh ïa ka jingbei tyngka lyngba ka Ministry of Panchayat namar ba kam don kano kano ka kyndon ha ka Riti Synshar ka Ri kaba kdew nangto kane ka jaka treikam kan ïoh ïa ka jingkyrshan pisa.

Shuh shuh u Deputy CEM u la ong ruh ba katkum ka Amendment Bill, ka jingkyrshan pisa sha ki District Council kan long lyngba ka Article 280 watla ki don katto katne ki jingkhanglad.

Shuh shuh u ong ruh ba ha ka 125th Amendment, ïa ka kyntien ‘Village Council’  ki dawa ba dei ban pynrung da ka kyntien Village Dorbar bad ha jaka jong ka Muncipal Council pat ban pynrung noh da ka kyntien Town Committee ne Town Dorbar khnang ba kan nym ktah ïa ka rukom synshar shnong ha ka jylla.

U Bah PN Syiem u la  pynpaw  ruh ba ïa ki Rangbah Shnong dei ban jied da ki Hima ne ki Elaka katkum ki kyndon jong ka district council. U ong ruh ba ïa kum kine ki elekshon ym dei satia ban pynlong da ka tnad Election jong ka sorkar jylla.

Haba kren pat halor ka mat, ‘unrepresented tribes’, u ong ba ka KHADC ka kwah ba kam dei ban don kano kano ka jingkdew hynrei ka dei tang ban kdew kyrpang ba dei ban don katta katta ngut ban pynrung kum ki dkhot shu sieh ha ki district council.

La ïathuh ruh ba halor ka jingïakren ban pynbun ïa ka jingdon ki MDC ha district council, u Deputy CEM u la ong ba ki don ki jingai jingmut ba dei ban don 36 ngut ki dkhot ba la jied bad ar ne saw ngut kiba la tyrwa ban shu thung kumto (nominated).

“Ïa kane ka mat ngin sa nang ïa kren ïa kren bad ka sorkar,” u la bynrap biang.

Kumba ka long mynta 29 ngut ki dei ki MDC ba shu jied da u paidbah bad uwei ba shu thung.