Shillong, Rymphang, 21: Kum shibynta na ka jingrakhe ïa ka National Science Day 2024, ka State Council of Science Technology & Environment, Meghalaya ha ryngkatlang bad ka Shillong Science Centre ki la pynlong lang ïa ka Science programme kaba shi taïew kaban sdang naduh ka 26 tarik mynta u bnai haduh ka 3 tarik u bnai Lber, 2024.
Ha kane ka prokram kaba shi taïew kan don ka jingmareh ïakob marathon ne ka Open to All Run for Science (Marathon) Competition ka ban long ha ka 26 tarik mynta u bnai, 2024 ha ka por 6:15 mynstep. Kan don ka jingpynrung kyrteng ha ka jaka naduh ka por 5:45 baje mynstep. Ka jingmareh kan sdang na Polo Parking Lot sha Golflinks-Mawroh-Sanker-Shillong Science Centre.
Kiwei pat ki prokram ki long ka jingleit jngoh ïa ki jaka bapher bapher, ka jingpeit ïa suiñbneng ha ka por mynmied ne ka night sky observation, ki workshop bad seed ball plantation ha kylleng ka jylla.
Ka prokram kaba kham kongsan kan long ha ka 28 bad 29 tarik mynta u bnai, 2024 ha State Convention Centre, Shillong ha kaba kumba 400 ngut ki nongïashimbynta kin shimbynta. Ha ki prokram ba ar sngi kin don bun ki kam ba kynthup ïa ka exhibition da ki seng ba ïadei bad ka saïan (Scientific Organizations), ki jingkren na ki riewshem phang, ban ïoh shimbynta ha ki science experiment, science model exhibition da ki School Eco-Club, ka video screening halor ki tiar trai ri trai muluk (indigenous technologies), ki science skit, puppet show bad kiwei pat ki jingïakob kum ka painting, extempore speech, open quiz, bad kiwei.
