Yn die synsar kumno tang bai trei ruh ym mih, 12 tarik yn lum ka Myntri ïa ki nongkhaïi

Shillong, Lber 01: Ka jingud jingnam ki nongkhaïi synsar ka la wan na kylleng kylleng ki jaka jong ka Ri Khasi Jaiñtia, namar ha ka por ba ki la dei ban die noh ïa u synsar ba ki la rep, jraiñ raiñ raiñ hiar ka dor bad kiba bun mynta ki la shu ïam kthang, namar kam mynroi shuh ban die, haba wat tang ka bai trei ruh kam mih shuh.
Ki nongïalam jong ka Hill Farmers Union (HFU) ki la ïathuh ba ka daw jong ka jinghiar dor u synsar kadei namar ka jingbun palat u mar, ha kaba wat uba mynshem snem ruh um pat lut bad mynta ka snem ruh u bun bha.
Na ka liang ki nongïalam ka Seng hynnin ka sngi ki la leit ban ïakynduh ïa ka Kong Ampareen Lyngdoh, Myntri ka tnad kam rep ban ïakren ïa kane ka jingeh ba ki nongrep synsar ki ïakynduh.
La ïathuh ba mynshem snem ka dor u synsar ka long haduh 150 shi kwintal, hynrei mynta tang 50 tyngka ruh um poi shuh.
Ki nongrep na ki thaiñ Kynrud kaba long kawei na ki jaka ba ju rep synsar bad khamtam kadei ka jaka ba kham jngai, ki la ud la lynñuar namar kane ka jinghiar dor, ha kaba ki la ïathuh ba wat tang ka bai trei ruh ym mih shuh. Ban kit sha ki jaka ban die ruh um nud namar ba rem ka bai kali nalor la hiar lypa ka dor die. “Ngin phah skul shuh kumno ïa khun, haba ngi la shaniah beit na ka jingïoh die ïa u synsar na ka bynta ban pyndap ïa ka bai skul, bai kot, bai uniform bad kiwei kiwei de ki jinglut.
Ki nongïalam ka HFU ki la ïathuh ba ka Myntri ka la pyntip ba kan sa lum ïa ka jingïalang bad ki nongkhaïi synsar ha ka 12 tarik mynta u bnai ban ïakren halor kane ka jinghiar dor khnang ban lah ban weng ïa jingeh jong kito kiba la ju im ja na kaba thung synsar.