Shillong, Nohprah 08: Ka sorkar jylla kan sa khmih bniah ïa ka jingtyrwa ban pyntreikam ïa ki pumped storage power projects (PSPs) hadien ba la dep khmih ïa ki rukom treikam ne draft PSP policy jong ka sorkar pdeng.
Haba pyntip ïa kane na ka liang u Myntri ka tnat bording jong ka sorkar jylla u AT Mondal u la ong, “Ap shwa ngin ïa peit haduh katno ka power policy kaba dei ban ïaid katkum ka PSP kan long bad halor kane ngin sa rai la ka long kaba biang ban pyntreikam ha kane ka jylla jong ngi.”
Katkum ka jingong jong u ka sorkar pdeng ka dang peit ban pyndep ïa kane ka kam bad kumba ka long mynta ka jingpynkhreh ïa ka PSP policy ka dang don hapdeng jong ka jingpyndep.
Na ka liang jong u Mondal u la pyntip ruh ba ïa kane ka kam jong ka PSP u la dep ban kren teng hapoh ka jingïalang jong ki Myntri bording kaba la long dangshen.
“Yn dang ïoh ïa ki jingshai ha kaba ïadei bad kane ka kam,” u la ong.
Haba kylli, na ka liang jong u Myntri u la ong ba ka National Thermal Power Corporation (NTPC) ka la dep ban ai ka jingtyrwa kaba long 1000 megawatt kaba long ruh na ka bynta ka North Eastern Electric Power Corporation Limited (NEEPCO) kaba don ki project kiba long 1400MW bad 800 MW da kaba bynrap ba ka OTPC kan dei ban pynurlong ïa kane ka project.
“Ha kaba ïadei bad kane ka bynta ngi hap ruh ban peit haduh katno ka jylla kan ïoh ka jingmyntoi na kane ka kam,” u la bynrap.
U la ïathuh ruh ba ki la don haduh 3 tylli ki jaka ba la ithuh da ka NTPC na ka bynta ban pyntreikam ïa ki PSP project bad artylli ki jaka la ithuh da ka NEEPCO ha jylla Meghalaya.
Ha kawei pat ka liang, ki tyllong khubor ki ïathuh ba ka sorkar pdeng ka la kyntu ïa baroh ki jylla bad union territories ba kin dei ban shim khia na ka bynta ban pyntreikam ïa ki PSP.
Ki jylla kin ïoh 12% ka bai bording kaba ym donkam siew kaba long ruh lyngba ka jingring bording napoh ki wah.
