Baroh shi katta te ki long ïing long sem, ka imlang ka sahlang ka ïeng ïaleh pyrshah beit tang ïa ka kyiad hynrei kaba dang ma shuh shuh mynta ka long sa ïa ki drok namar kine lei lei ki dei ki jingdih kiba ktah tam ïa ka imlang sahlang bad ka long ïing longsem. Ka long thik kumba baroh shi katta ka imlang ka sahlang ka dang mad tang ïa ki kuli jong ki ktang suloi kata ka kyiad hynrei mynta ka la mad syndon da u bom uba dei u drok.
Balei ba ong kumne, hooid ïa ka kyiad phi dang lah ban lap ïa ki khun ki kti, ki kurim, ki para ki pyrsa ba ki dih namar ka jingsma jongka, kaba long thik kumto kumba sei ïa ka pistol ne suloi bad siat bad ki bakhor ki sma beit hynrei ïa u drok te kynmaw ym don ba lah ban lap lada jia ba u ne ka khun samla, rangbah bad ter ter ki leh, namar ym don jingsma bad ha ïing te ki long beit jai jai hynrei sha lyndet pat ym tip ki leh aiu ruh. Dei tad haba u ne ka ki la kyrni bha ba kiba ha ïing hasem ki sa tip bad wei ba u la kyrni bad u ne ka kim ïoh shuh ban dih lyngba ki paralok u ne ka kin sa sdang ban thaw jingkulmar ha ïing hasem ban dawa pisa bad lada kim ïoh ïa kaba ki dawa tang ban ïoh thied ia u drok kim salia wat ban rah wait ne pynap pistol wat ïa ki kmie ki kpa ruh.
Kane kadei kaba jia ym tang ha kane ka jylla Meghalaya hynrei ka dei kaba jia ha satlak pyrthei. Kumba long da shisha mynta kane ka kam khaïi bad dih drok ka la shyrkhei palat haduh katta katta ha kane ka jylla Meghalaya. Lada phai sha ki district bapher bapher imat kane ka jur bha mynta ha man la ki district jong ka jylla Meghalaya khamtam ha kine ki district jongka Jaintia Hills bad Khasi Hills.
Ym lah ban len na ka liang ki bor pulit jongka jylla ki la trei bor bah bad ki la ïoh kem ïa kiba bun ki nongkhaïi bad nongdih droks khamtam eh kum ki pulit jongka East Khasi Hills lyngba ka Anti Narcotic Task Force (ANTF). Hynrei wat la katta ruh ym lah ban tehlakam ïa kane ka kam namar ba la iïh phrung khlieh da kito ki nongpynïaid ïew ïa u drok shaduh ki dong ki shnat jong kane nongbah Shillong bad wat sha kiwei kiwei ki dong bad ki shnat jong ki District bapher bapher.
Kumba la kdew ia ka kyiad te lah ban tip haba dih hynrei ïa u drok te ym lah, kumta halor kane kaba nyngkong eh ka dei na ki kmie ki kpa ne kiba ha ïing hasem ban peit bad bishar bniah ïa ka ïaid ka ïeng ka rukom im jong ki khun ki kti jongki. Hooid ha ïing te ki lah ban nym pynpaw ei ei hynrei ha lyndet te ym tip ki leh aiu.
Ka long kaba dei eh ba ki nongmihkhmat khamtam kum u bah Ardent Basaiawmoit u shim khia ïa kane ka kam da kaba un leit rah syndon da ka mat jingïakren hakhmat ka ïing dorbar thawaiñ jongka jylla namar utei u nongïalam seng bhalang ba mynshwa bad nongmihkhmat jong ki paidbah ba mynta u tip bad sngwthuh ïa kaei kaba ka im lang ka sahlang ka mad. Kane ka jingleh jong u bah Ardent dei ban ai jingïaroh da ki paidbah namar u ïohi jngai lada ym lah ban teh lakam ïa u droks ka jaidbynriew bad ka imlang sahlang ka la don shisha ha tmier. Namar ka jingma kaba ap ïa ka jaidbynriew kam dei na kino kino ki daw hynrei dei na u droks namar wei ba la ngop ki khun samla ha u droks ym tip aiu shuh kan jia ïa ka jaidbynriew bad hato yn dang don kiba khie khlieh ban ïada ia ka jaidbynreiw.
Halor kane kaba kongsan tam ka long ba ka sorkar ruh ka dei ban pyrkhat jngai ban thaw ki kyndon aiñ kiba pyrkhing bha nangne shakhmat bad lehse da katei ka jingwanrah ïa katei ka mat hakhmat ka ïing dorbar kan sa mih ka rai ban don ka aiñ ba kyrpang jongka sorkar jylla ban teh lakam syndon ïa kane ka kam khaïi bad dih drok ha ka jylla da kaba rai da ki jingpynshitom kiba pyrkhing ym tang ïa kiba khaïi hynrei wat ïa kiba dih ruh kumjuh.
Nalor kane kaei kaba donkam eh ka long ban don ka jingïatrei lang hapdeng ki bor pulit, ki bor Dorbar Shnong, ki Seng Longkmie, ki Seng Samla Shnong, ki Seng Bhalang bad ki paidbah khnang ba da ka juh ka sur yn lah ban rat dyngkong ïa kane ka kam khaïi bad dih droks kaba ap ïa ka imlang ka sahlang bad ka jaidbynriew ha ka jingma kaba khraw.
