Shillong, Nailur 26 : Ka BJP kam pat rai ïano kan ai tiket ban ïakhun ïa ka election MP Lok Sabha na baroh ar tylli ki constituency ha kane ka jylla kata ka Shillong bad Tura Parliamentary Constituency.
ïa kane la ïathuh da u nongïalam ka BJP u bah A.L Hek haba ïakren bad ki nongthoh khubor.
U la ïathuh ki la don bun kiba wan pan tiket na ka party tangba ka party haduh mynta kam pat rai ïano kan ai ruh na baroh ar ki constitueny.
U la ïathuh ba ki Mandal jong kine ki constituency ki dang bishar bniah bha ïano kin jied ban long ki kyrtong jongka party.
Haba kylli hato ka don ka jingpyrkhat ban jied da u kyrtong ba ïamon lang da baroh ki party ba don ha ka MDA u bah Hek u la ïathuh hangno bad mynno la ju don ïa u kyrtong mon lang namar ha ka election ba la dep ka UDP ruh ka sei kyrtong ka BJP ruh ka sei la u jong u kyrtong wat la ïatrei lang ha ka MDA ruh kumta kam don ka jingpyrkhat kaba kum kata. Yn sa ïa pyrkhat ïa kata tang lada don ka jingkyrpad na kiwei ki party hynrei ka BJP kum ka National Party kan pynïakhun kyrtong beit ha kane ka election.
Ha ka electionn MP ba la dep ha u 2019 ka la don ka jingpynbor ïa u bah Hek na ki nongïalam ka party ban ïa aireng kum u kyrtong ka BJP hynrei namar ba i kmie jong u im da khlaiñ bha kumta u khlem mynjur satia.
