Shillong, Naitung 11 : U Superintendent of Police ka East Khasi Hills Bah Sylvester Nongtnger mynta ka sngi Ba-ar, ula pyntip ba ki Pulit kin dang pynngat kyndon ïa ki briew kiba la kem halor ka huri hura bad ka jingthang kali ha phyllaw ka Laitumkhrah Police Station.
“Kane ka kam ka dang ïaid ha ka jingtohkit mynta bad ngim pat file ïa ka chargesheet hynrei u Investigating Officer (IO) u dang leh ïa ka kamram” ong u Bah Nongtnger haba ïakren bad ki nongthoh khubor.
Ha ka 8 tarik, san ngut ki briew kiba dei na ki arkynhun mamla ki la shah kem halor ka jingïashoh ïadat kaba lam sha ka jingshah wiang ding lai tylli ki kali ha Laitumkhrah Police Station.
ïa kine ki san ngut la ïalam tian bishar hakhmat ka ïingbishar kaba la rai ban shah tohkit 5 sngi ia kine kiba shah kem ha byndi ki pulit. Haba kylli la kan dang don ka jingkem briew, u SP ula ong “Kane kan sa wan ynda la dei ka por. Ngam lah ban iathuh ïa phi. Ngam lah ban batai lypa hynrei u IO u dang leh ïa ka kam”.
Ha ka sngi Palei, ka la mih ka jingïashoh ïadat hapdeng arkynhun mamla hajan ophis DHS ha Laitumkhrah bad kane ka jingwiang ding ïa ki kali kala jia haba kine ki ar kynhun ki la ïakynduh biang ha Laitumkhrah Police Station ban ïa ujor ejahar.
Katba ki ar kynhun ki dang ïania hapoh Thanad, katto katne ngut ki briew kiba ïalum shabar, ki la wiang ding ïa kawei ka gypsy ki pulit, kawei ka tourist taxi bad kawei ka thuk thuk kiba pynïeng hapoh thanad.
Kine ki briew kila lun maw ruh ïa ka thanad bad pynjulor ïa ki jingkhangïit.
