Mawkyrwat, Jymmang, 28: Ïa ka met jong u Bah Sainkupar Lyngkhoi, 22 snem ka rta na ka shnong Lawblei, South West khasi hills District uba la ngam jyllop ha Wah Umngi ha ka Sngi U Blei ha ka por kumba 7:00 baje eiei janmiet ym pat lah satia ban lap wat hadien saw sngi.
Dei ha ka 25 tarik mynta u bnai katba u Bah Lyngkhoi u dang leit tong doh ha ryngkat ki lai ngut u la hap ha kawei ka thwei kaba tip kum ka Shar Shar ha Wah Umngi kaba jngai kumba 2 kilomitar na ka surok bah Mawkyrwat sha Shillong.
U Secretary ka Shnong Lawblei Bah Srinly Syiemlieh u la ïathuh sha ki lad pathai khubor ba ka dorbar shnong ka la pynlong ïa ka jingleit wad paidbah manla ka sngi naduh ba ula hap bad ngam jyllop hynrei haduh mynta kim pat lapdien ei ei.
“Ka jingbym pat lah ban ïohi ne ïoh ban sei ïa ka met jong u lehse ka la lah ban dei ba u sahkut hapoh ki krem maw namar ha kitei ki jaka ba u la hap ka dei ka jaka kaba long riat bad long krem shapoh bad ka long ka jaka kaba eh shibun ban leit ngam,” u la ong.
“Wat ka kynhun Search and Rescue Teams (SRT) na Shillong bad ki nongtrei ka tnat Fire & Emergency Services (F&ES) na Mawkyrwat ki la pyrshang ha ka 26 tarik mynta u bnai kaba dei ka sngi nyngkong”, ong u Bah Syiemlieh.
