Ym pat ju jia ha ka histori ka KHADC ban leh klet ïa ki MDC ba la khlad, khyrwit u Bah Titos

Shillong, Lber 26 : U Nongïalam ka Liang Pyrshah ha KHADC, Bah Titos W Chyne u la khyrwit tyngeh ha ka sngi sdang jong ka Dorbar Mangtyngka jong ka Council ha kane ka sngi Balang da kaba ong ba kane kam pat ju jia satia ha ka history jong ka KHADC ba yn leh klet ban kynmaw burom ïa ki MDC kiba la khlad noh.
“Haba don ba khlad ki MDC ba rim ka ju don ka jingkynmaw burom ïa ki hynrei kaba sngewsih kthang mynta ka sngi ka long ba ka khlem paw ha ki mat ïa kren ban kynmaw burom ïa u MDC barim jongngi na Sohra constituency uba la khlad ha ka 22tarik bad la tep donburom ha ka 24tarik.Nga pynpaw ïa ka jingsngewsih kthang namar kadei ka bym pat ju jia hangne ha District Council ba ha kum kine ki Dorbar ba ngin klet ïa ki nongmihkhmat jongngi kiba la khlad, ba ngin ïoh ban kynmaw burom khatduh ïa ki” ong u Bah Titos haba kren ha ka sngi sdang jong ka Dorbar.
Nangta, u ong ruh ba kane ka ktah eh ïa u shimet khamtam naba u dei uba la mihkhmat ïa ka Sohra constituency.
U Bah Titos u la ong ruh ba wat ha ka sngi ontep ruh u donlang. “Ngam kwah ban kren hynrei ngam banse ban kdew namar nga ïohi ba ym shym la pynpaw ha ki mat ïakren. Wat na ka VPP ki la ai jingkren ha kane ka sngi ha kaba ki ong ba u dei u dkhot jong ka party. Kumta nga lyngoh ba kumno pat ba na ka liang ka EC ba phi klet namar kadei ka bym pat ju jia koit ha ka history jong ka KHADC,” bynrap biang u Bah Titos.
Tangba ha kawei ka liang, u Nongïalam ka Liang Pyrshah u la ong ba um kwah ban kren eh namar u sngewthuh ba ka dang dei ka sien ba nyngkong jong ki bad ki dang lung ha ka EC bad kumta ki la klet ban kynmaw ïa ka bynta kaba kongsan tam ka bym pat ju jia .
“Nga kyrpad ïa u Shongknor ba donburom ban pynrung ïa kane ka mat bad nga kyrpad ïa u CEM ban wanrah ïa ka official condelence resolution na ka liang ka EC khnang ba ngin ïoh ban leh kumba ngi ju ïaleh haba shong dorbar ban kynmaw ïa ki MDC jongngi kiba la khlad noh,” bynrap biang u Bah Titos.
Nangta u kyntu ruh ïa ka ophis ba kan wad jingtip kaba kham bniah halor une u rangbah, uba tip kyrteng kum u Bah W Mathew Mawdkhap uba la long MDC naduh u snem 1979.
Halor kane, na ka liang u Chairman ka Council, Bah Strongpillar Kharjana u la pyntip ha Iing Dorbar ba na ka liang ka ophis ruh ki khlem ïoh kano kano ka jingpyntip kaba tikna bad dei na kata ka daw ki khlem lah ban leh ïa kaba donkam ban leh. “Ngi sngewsih shisha ïa kata, nangne shakhmat ngin ngeit skhem ba kine baroh kin ym jia shuh. Nga kyrpad ïa ki dkhot iwei pa iwei haba ki ïoh ïa kine ki jingtip kin ïa ai lang ïa ka jingpyntip sha ka ophis jong u Chairman,” ong u Chairman.