Jowai, Nohprah 06: Ki nongïalam bahakhmat eh jong ka seng kieng atiar Hynñiewtrep National Liberation Council (HNLC) kim pat ai ïa kano kano ka rai halor ka jingkyrpad jong ka Sorkar ba kin wan shakhmat ban bteng ïa ka jingïakren ïasuk.
Ha ka jingïakren bad ki lad pathai khubor ha ka sngi Balang, u Symbud Myntri Rangbah Bah Prestone Tynsong u la ong, “haduh mynta, ngim pat ïoh (kano kano ka jingpyntip na ki nongïalam ka seng HNLC).
U la ong ba ka HNLC ka la pyntip sha ka Sorkar ba kano kano ka jingpyntip kaba wan na ka Sorkar ka dei ban ïaid lyngba na u ksiang ba ka seng ka la thung u Bah Sadon Blah, uba long ruh u President jong ka Hynñiewtrep National Youth Front (HNYF).
Halor ka jingdawa jong ka HNLC ban map noh ïa ki mukotduma, u Bah Tynsong u la ong, “ïa kine ki ishu ngin sa lah ban ïakren ha ka miej. Ynda ki nongïalam bahakhmat eh jong ka HNLC ryngkat bad ki Ksiang jong ngi na ka Jylla bad na ka Sorkar Pdeng ki la shong jingïalang kin sa lah ban pynpaw hakhmat ka Sorkar bad ong kiei ki jingmynjur.”
U la ong ba ka Sorkar ka ïaiban ïa ka jingïakren ïasuk kan dei ban long beit bad ki nongïalam ba hakhliehduh jong ka HNLC.
“Ngan ïai kyrpad ïa ki nongïalam bahakhmat ka HNLC, ka jingkhang ka plie ban ïakren. Kawei ka kylla jong ka jingïakren ka ladep. Ngi kwah ban ïohi sa ïa ka kylla kaba ar, kaba lai bad kaba saw tad haduh ba ngin sa poi haduh kaba kut,” la bynrap u Bah Tynsong.
