Ban pyrshah 100 percent ngim pyrshah ïa ka lynti rel hynrei donkam shwa ïa ka ILP ong u heh KSU

By Mawphor News Desk On Dec 7, 2023

Shillong, Nohprah 06 : Ka Khasi Students Union (KSU) lyngba u General Secretary u samla Donald V Thabah ka la kren shai ba ka seng kam pyrshah 100 na ka 100 ïa ka lynti rel, hynrei donkam ban pyntreikam shuwa ïa ka Inner Line Permit (ILP).
U samla Donald V Thabah haba kren sha ki katto katne ngut ki nongthoh khubor u la ong ba ka jingpynlong aiñ ïa ka ILP hapoh ka jylla kadei kaba hakhmat tam khnang ban teh lakam ïa ka jingwan rung kyrthlep ki briew ba nabar.
“La bun tylli ngi la ïohi ïa ki jingkren kynthup naduh u Myntri Rangbah bad kiwei kiwei ba lada wanrah ïa ka rel kit mar kan pynhiar dor ïa ki mar ki mata bad kumjuh kan ïarap ïa ki nongrep. Hooid ngim pyrshah 100 na ka 100 ïa ka lynti rel, hynrei ngi tip ba lada ym don ki aiñ kum ka ILP ban ïada ïangi ki rit paidbah kan pynsuk ïa ki poi ei ban wan rung hapoh ka jylla,” u la ong.
“Kan myntoi aiu ïangi lada kan wan kata ka rel kit mar namar ka lynti ka la don lypa bad ym slem shuh ka rel kit briew ruh kan wan bad ha kata ka por ngim tip shuh u nongrep Khasi ne nongrep bar jylla namar ba ngi la shah tyllep ha kiwei pat ki Jaitbynriew,” la bynrap u samla Donald.
Une u nongïalam jong ka KSU u ïamynjur lem bad ka jingong u Bah Mayralborn Syiem MLA ka Nongpoh uba la pynpaw ba ka jylla ka donkam ïa ka lynti rel hynrei hap ban pyntreikam shuwa ïa ka ILP bad ka MRSSA.
“Ka Khasi Students Union ruh ka ban ha kata hi ba lada ym pat lah ban pyntreikam ïa ka ILP ngim pat shah ïa ka lynti rel ba kan wan hapoh ka Bri U Hynñiewtrep,” u la ong.
U samla Donald V Thabah u la ïathuh ruh ba ka seng na ka por sha ka por ka phah ka jingthoh bad ha u snem 2019 ka seng ka la phah ka jingthoh ha ka sorkar pdeng ha kaba ïadei bad ka CAA bynthup ban pyntreikam ïa ka ILP bad kumjuh ruh ban pynrung ïa ka ktien Khasi, hynrei ka sorkar pdeng ka shu kut tang ha kaban eksamin.
“Ka seng ka la dawa pyntreikam ïa ka ILP naduh u snem 1985 bad la ïakhih ha u 1987, 2001 bad 2013 hynrei ha Manipur ki ïakhih tang shisien ka Sorkar Pdeng ka ai ïa ka ILP. Hynrei ngi sngew lyngngoh pat ba balei ïangi kam ai ba ka hap ban eksamin, hato ka don jingïapher aiu hapdeng ka Meghalaya bad Manipur.”
U la ong, “Kane lehse ïoh don ki bym dei ki trai ri trai muluk ki bym kwah ban pyntreikam ïa ka ILP ki kynshoit ïa ka sorkar pdeng bad ïoh lehse don ki khwan myntoi shimet kibym kwah ban don ïa ka ILP kaba long ka nongïada ïa ngi ki tri ri trai muluk kiba rit paid hapoh ka ri India”.