Jowai, Rymphang 29: Ka Khasi Students’ Union (Jowai Circle) hapoh ka jingïalam jong Vice President Samla Morning Pasi, u General Secretary Samla Nidapoi Shadap, u Education Secretary Samla Conard Sana jong ka Jowai Circle, ka President KSU Girls’ Wing & Education Secretary (War Jaiñtia Circle), oa Samla Ladaplin Hayong lem bad ki Dkhot jong ka Jowai Circle, ki la ïoh ban leit jurip ïa ka Govt Girls’ Hostel kaba don ha Mynthong, Jowai.
Ha kane ka jingleit jurip la ïoh ban kynduh ïa ka Principal jong ka Govt Girls H.S. School bad ka la ïathuh ba katei ka Hostel ka long ka bym long shuh ban sah ki khynnah namar ka long kaba la jot rathai bad ki kynroh ki biar ki la sdang orpait bad ka long kaba buh jingma ïa ki khynnah lada pynsah ïa ki.
Shuh shuh katei ka Principal kala ïathuh ruh ba na ka Liang ka School ki la dep buh shibun ki jingthoh sha ka sorkar ba dei ban peit khmih hynrei na ka liang ka sorkar ka dang wan tang shisien ha u snem 2023 ban leit jurip bad la ïathuh ruh ba katei ka Hostel kam long shuh kaba dang lah ban pynshna maramot (Repair).
Ka seng hadien ba la ïoh ban leit peit ïa ka jinglong (condition) jong katei ka Hostel la lap shisha ba katei ka Hostel kam long shuh ban sah ki khynnah. Na ka liang ka Seng kan ïai buddien ïa kane ka kam sha duh ki bor ba halor jong ka sorkar khnang ba katei ka Hostel kan long kaba treikam.
La ptnsngew ka jingdon jong ki Govt Hostel kan pynsuk shibun bha ïa ki khynnah kiba wan pule sha Jowai kiba na ki shnong ba jngai na Jowai.
La ïathuh ruh ba katei ka Hostel ka lah ban ngiam haduh 80 ngut ki khynnah skul. Hynrei na ka daw ka jingsniew jong katei ka Hostel, la hap ban khang noh ïa ka ha u Snem 2018. Pynkut ka kyrwoh na u samla Nidapoi Shadap General Secretary Jowai Circle.
