Nongstoiñ, Jymmang, 31: Hadien ka jingmih madan jong u bah Ardent Miller Basaïawmoit na ka seng VPP ban lamkhmat ïa ka jingdawa pynthymmai ïa ka bhah thungkam thungjam hapoh ka jylla Meghalaya, la bteng ban mih sa kiwei kiwei pat ki mat kaba la iohi ruh lyngba ki lad pathai khubor kaba ong kan kham bha ban ioh noh ia la ka jong ka jylla bad kata ka long ka Khasi and Jaiñtia State.
U President ka Mawshynrut Youth Movements u samla Shemborlang Rynñiaw u la ong ka kyntien Khasi and Jaintia State kan lam sha ka ban pharia ne phiah ia ka jaidbynriew. “Ngi pyrshah bad ngi kwah ban dawa da ka Khasi State namar baroh ki hap hapoh ka shatri jong ka Khasi, la dei u Khynriam, u Pnar, u Bhoi, U war, u Maram, u Lyngngam bad kiwei kiwei ki dei tang ki sub tribe jong ka jaidbynriew Khasi”, u la ong bad bynrap, “lada mih palat ka jingsngew pher ngi ruh ngi pher ban ngin ym kam ialade kum kita ki Khasi, hynrei ngi iawer sha ka jingiatylli bad kan bha shibun da ka “Hynñiewtrep Land”, kaba lah ban pyniatylli ia ka jaidbynriew kaba tang shi troh.
