Shillong, Risaw 10 : U Myntri ka tnad ka Koit ka Khiah ka sorkar jylla, James K Sangma u la ong ba um sngew ïahap satia ïa ka jingpyndonkam da ki bom lyer pynsat khmat ïa ki nonghikai kontrak kiba mih ban dawa ïa ka hok jong ki ha ka 06tarik mynta u bnai.
Haba kren bad ki lad pathai khubor, u Myntri u la ong ruh ba katei ka jingjia kadei ka bym lah satia ban pdiang bad ruh kadei ka jingjia kaba sngewsih bad u pynpaw ruh ba kum kitei kim dei shuh ban dang ïai jia.
Kadei ha ka taiew ba la dep ba ki nonghikai kontrak hapoh ka lama jong ki Meghalaya Government Lower Primary School Contractual Teachers Association (MGLPSCTA) ki la mih na ka jaka ïakhih jong ki ban leit tur sha Secretariat ban dawa na ka sorkar jylla ba kan thung kam biang ïa ki bad dei ha katei ka por ba la mih ka jingpyndonkam da ki bom pynsat khmat ban pynpra ïa kitei ki nonghikai.
Na ka liang ki nonghikai ha katei ka janmiet hi ki la pynbna ba la weng noh ïa ka jingïakhih jong ki kaba la neh shi bnai lynter.
