Ym ïadon bynta ka Assembly bad ka jingaiti tohkit khyllem dome sha ka IIT Guwahati

Shillong, Risaw 04: U Lamphang ka Ïing Dorbar Thaw Aiñ ka jylla u Bah Metbah Lyngdoh u la ong ba na ka liang ka ophis jong u kam don bynta eiei ban rai ïano ban thung kum ka kynhun tohkit halor ka jingkhyllem ka tnum pyllun bad ruh ka jingaikam pateng ban pyntrei(subcontract) ïa ka ïing dorbar ba thymmai namar kane ka dei kaba leh bad dei peit da ka sorkar.
Lah ban kdew hangne ba hadien ka jingkhyllem jong u Dome ha ka jingtei ïaka ïingdorbar ba thymmai ha Mawdiangdiang, ka sorkar ka la aiti ha ka IIT Guwahati ban tohkit halor kane ka jingkhyllem, kaba la jia ha ka 22 tarik u Jymmang mynta ka snem.
Haba kren sha ki lad pathai khubor u Bah Metbah u la ïathuh ba ka Assembly Seceretariat kam don jingïadei eiei halor ka jingkynnoh ba u kontraktor u la ai sub-contract ban tei ïa ka ïing dorbar thymmai ha Mawdiangdiang namar kane ka hap beit haka jingpeit jong ka sorkar jylla.
“Ïa kane ka bynta phi lah ban kylli naka sorkar bad na ka tnat PWD Building namar ka Assembly Secretariat kam don bynta ban peit ïa ka jingpyntrei ïa ka ïing dorbar”, ong u Bah Metbah.
Haba ïadei bad ka jingdawa ka All India Trinamool Congress (AITC) ha ka sngi 30 tarik Nailar ba dei ban ai tohkit biang ha ka Indian Institute of Technology (IIT) Rourkee halor ka jingkhyllem ka tnum pyllun jong ka Ingdorbar Thawaiñ ba thymmai ka Jylla namar ka jingaiti ka sorkar ban tohkit ka IIT Guwahati la leh khnang ban ïada ïa kine ki kontraktor na ka jingshah pynshitom namar ka jingtrei torti, u Bah Metbah u la ong ba na ka liang ka Assembly Secretariat kam don bynta eiei ban jied ïa ka ki kynhun ban pynlong ïa ka jingtohkit ïa kane ka jingkhyllem ka tnum pyllun.
U la ong ruh ba na ka liang ka Assemby Secretariat kam don jingtip eiei halor ka jingkynnoh ba ki kontraktor ki don ka jingïadei lypa bad ka IIT Guwahati namar kane ka jingthung kynhun tohkit baroh la leh beit na ka liang ka sorkar.
Haba ïadei bad ka jingkynnoh ba ka don ka jingai kontrak pateng sha ka Badri Rai & Co. ka kompeni ba la shah kyntait ha ka por ba khot tender na bynta ban ïoh pyntrei ïa kane ka ïing dorbar thymmai, u Bah Metbah u la ong ba na ka liang jong u um don jingtip eiei ïa kane namar ïa kane ka kam la leh beit da ka sorkar bad ka PWD(Building).
U Bah Metbah u la pyntip ruh ba shen na ka liang jong u un sa khot ïa ka jingïalang jong ka High Powered Committee (HPC) na ka bynta ban shim sienjam haba ïadei bad ka jingtei thymmai biang ïa ka tnum pyllun (Dome) jong ka ïing dorbar kaba la khyllem ha ka step phyrngap jong ka 22 tarik Jymmang 2022.