Ym hun ki san seng ïa ka rai ka Myntri halor ka Nongstoiñ Maternal & Child Health Hospital

Nongstoiñ, Jylliew, 29: Ki Sengbhalang kiba kynthup ïa ka WKSU, WYF, UHM, HANM bad MYF ki la pynpaw ïa ka jingbym hun ha kba ïa dei halor ka jingbym lah na ka liang ka sorkar, ban ai ka jingtip kaba tikna ha kaba ïadei ba ka jingleit jurip ka Myntri ka Koit ka Khiah ka Sorkar Jylla ka Dr. Ampareen Lyngdoh ha ka 26 tarik mynta u bnai.
Kum ban shu pynkynmaw ba ha ka 19 tarik mynta u bnai na ka liang jong kine ki 5 tylli ki Sengbhalang, ki la ïoh ban ïakynduh bad ka Myntri ka Koit ka Khiah ha ryngkat ka dorkhas ba ki la aiti sha I ha kaba ïadei bad ka Maternity Children Hospital.
Ha katei ka sngi na ka liang jong ka, ka la kular ban ïa kren ïa kane ka mat ym ha Shillong, hynrei in da wan jurip hi ïa katei ka hospital.
Ïa kiei kiei baroh ki mad jingïakren yn sa ïa tai ha katei ka sngi, hynrei kaba lyngngoh pat ha ka 26 tarik kam shym la don kano kano ka jingïoh jingtip, hato haei ka jaka bad ha ka por ba kumno yn pynlong ïa kata ka meeting kumba la kular. Dei halor kane ka nongrim ba ki san tylli ki Sengbhalang kim shym la hun.
Kawei ka sur ki la shim ïa ka rai ban ieng ha ka nongrim kumba la dep buh ka jingthoh ha u Deputy Commissioner ban nym shah da lei lei ïa kine ki tiar ba dang sah ha MCH Nongstoiñ ban kit sha South West Civil Hospital. Ki san tylli ki seng ki dap da ka jingsngew lyngngoh hadien ka jingbuddien mynta ka sngi bad la ïoh jingtip ruh ba ym dei tang ka ki Sengbhalang ba ka dkoh ka jingai jingtip.
Hynrei, wat ïa kawei ka tnad sorkar ïa kaba ka myntri ka la buh ban ïakynduh ruh kim lah shuh ban kynduh namar ka jingdkoh ha ka lad ai jingtip. Kumta na ka liang jing ki san tylli ki sengbhalang, ki pynrem jur ïa kane ka jingleh lyndet bad kular kai haba ïa dei ban ïa thir ïa tai ïa kane ka mat kaba dei kaba donkam tam ha ka dong ka thaiñ jong ka West Khasi Hills.