Shillong, Naitung, 20: U President ka HANM u Bah Lamphrang Kharbani, ha kak jingleit ai jingthoh sha u CEM jong ka KHADC u Bah Pynïaid Sing Syiem u la ong ba ka seng ka la dawa ba dei ban pynduh syndon noh ïa ka Raid Majai bad ka seng kam hun tang ïa ka hukum ban shu buh teng namar ka buh teng ka lah ban im biang ha kano kano ka por.
Halor kane haba kren ha ki lad pathai khubor u Bah Lamphrang Kharbani President ka HANM hadien ba la dep ban ïakynduh ïa u CEM la ong ba ki khun ki hajar ka Hima Sohra kim hun tang ïa ka jingbuh teng, ki kwah ba ka KHADC ka dei ban pynduh noh syndon ïa ka hukum ban ai jingithuh ïa ka Majai kum ka Raid, halor kane ka seng ka la ong ba ka KHADC kan sa pynmih ïa ka jingthoh ban pynduh noh ïa ka jingpynbna ba la pynmih ha u bnai Jylliew.
Ka jingthoh kaba ka seng ka la ai sha u CEM ka la kren ba ka dap da ka jingsngewsih ban ïohi ba hapoh jong ïalam ka jong u Chief Executive Member, ka Executive Committee hapoh ka KHADC, khlem da kynjoh ktien ïa ka Hima Sohra la ai biang ïa ka jingithuh ïa ka Majai kum ka Raid katkum ka jingpynbna kaba la mih ha ka 24/Jylliew/2024.
Ka seng HANM kam dei ba ka pyrshah khlem nongrim, hadien ba ka seng kala ïoh ïa ki kot ki sla kiba ïadei bad ka Majai, kane ka kyrteng Majai kam shym don ha ka soskular kaba la ïa soi hapdeng u Syiem ka Hima Sohra ha u snem 1829, ïa kaba la soi da u Soobha Sing Rynjah ha ka jaka jong u Dewan Sing Rynjah namar ba um ïohi shuh ki khmat.
Haba la ïoh ïa ka United Khasi bad Jaiñtia Hills Autonomous District Council, ka ophis jong ka Executive Committee ka District Council, ha ka 27/Rymphang/1964 ha ka shithi kaba la phah sha u Syiem ba shipor ka Hima Sohra haba ïadei bad ka jingjied ïa ki nongmihkhmat ban jied ïa u Syiem ka Hima, ha kane ruh ka kyrteng Majai kam shym paw kyrteng.
Ka ophis jong a Executive Committee k KHADC kala bishar bniah ïa ka kaiphod kaba la ïoh pdiang ha ka 6/Rymphang/2019 kaba la ai da ophisar ba la tohkit ïa kane ka kam, dei ha kane ka kaiphod ba la mih ka kyrteng Raid Majai ïa kaba ym pat don baroh shi katta.
Ka ophis jong ka Executive Committee jong ka KHADC ka la ïohpdiang ïa ka rai na ka dorbar Hima kaba la long ha ka 23/Nailur/ 2019 ka Executive Committee ka la sngew dei ban pynbeit noh ïa ka hukum kaba la pynmih ha ka 25/Jylliew/2019 ban wengnoh ïa ki kyndon Para 2 (iii) haduh (Xi) ha kaba la weng noh ïa ka kyntien Raid Majai bad pule noh kum ka “Majai” ïa kane ka jingpynbna la pynmih ha ka 7/Rymphang/2020.
Ka seng ka pyrshah jur ïa kane ka jingpynkhie im biang ka Executive Committee, ha ka jingïalam u Chief Executive Member, ha kaba ka ophis jong u Deputy Secretary jong ka Executive Committee ka KHADC la pynmih ïa ka jingpynbna ba la pynim biang ïa ka Raid Majai kumba la pynbna ha ka 24/Jylliew/2024.
Ka seng ka la ïohi ba ka EC jong u snem 2020 ka la pynduh ïa ka ktien Raid Majai bad buh ïa ka ktien Majai namar ba ka la ïoh ïa ka rai na ka Hima Sohra ban pyrshah ïa ka kaiphod jong ka kynhun tohkit kaba la ai sha ka KHADC ha ka 25/Jylliew/2019, kane ka jingleh jong ka EC kaba mynta khlem da ïa sngewthuh lang hapoh ka EC bad ha kajuh ka por khlem kynjoh ktien ïa ka Hima Sohra.
Ka seng ka dawa ba kane ka Executive Committee hapoh ka jingïalam u CEM ladei ban sngewbha wengnoh mardor ïa ka hukum kaba la pynmih ha ka 24/Jylliew/ 2024, namar ka EC ka la leh khlem da bud ïa ka lynti, na ka liang jong ka seng kan don ryngkat bad ka Hima Sohra ha kane ka jingïaleh pyrshah ïa ka jingleh don bor jong ka KHADC.
Na ka liang jong ka seng ka khmih lynti ba khlem don ki bor kiba na shalyndet ban pynbor ban ithuh ïa ka Majai kum ka Raid Majai, ka seng ka khmih lynti ban pyndon kam ïa ka ophis ban weng noh ïa ka jingpynbna kaba la pynmih na ka bynta ka bit ka biang ki raid ki hima katkum ka riti ka Ri India, kaba la pynkhamti katkum ka Sixth Schedule ban ïada ïa ka jaitbynriew.
