Shillong, Naitung 20: Ka IIM Shillong dangshen ka la pynrung klas ïa kumba 400 ngut kiba ïashim bynta na ka bynta ki Post Graduate Program (PGP) ha ka Management, kaba ïalam sha ka MBA degree. Kane kadei ka 17th batch jong kane ka program, naba kane ka jaka ai jinghikai ka la sdang ïa ki kam naduh ba la plie ïa ka batch kaba nyngkong ha ka 4 tarik u Naitung, 2008. Ka rukom pynrung kyrteng ka la long kaba shongkun ha kaba la ïohi ba ki samla pule ki la pynrung thep kyrteng ïalade na ki jaitbynriew bapher bapher hadien ba da ki snem jong ki jingtrei shitom bad jingaiti jong ki.
Ka rukom pynrung klas na ka bynta ka PGP 2024-26 ka la long kaba biang, kaba la sdang da ki CAT examination. Ha kane ka snem, ka IIM Shillong ka la ïohpdiang ïa kumba 2,29,533 lak ngut ki applicant. Ïa ka Personal Interview (PI) la pynlong ha kiba bun ki nongbah kynthup ïa ka Mumbai, Bengaluru, Hyderabad, Delhi, bad Kolkata naduh u bnai Rymphang haduh u bnai ïaïong, 2024, ha kaba kane ka la lah ban ïarap ïa ki eksam jong ki nongïakhun kum ka Communication Proficiency bad Personal Interview. Ha kaba khatduh kumba 400 ngut kiba ïashim bynta ki la shah jied ban pynïasoh sha ka PGP 2024-26 batch.
Ka PGP 2024-26 batch ka pyni ïa ka jingdon samla pule ne ka gender ratio kaba 45% ki samla kynthei bad 55% ki samla shynrang kiba ïashim bynta. Ka rta ki samla kaba long pdeng kadei kumba 23.7 snem ka rta, ha kaba kiba ïashim bynta kiba dang khynnah duh ki dei ha ka rta kaba 20 snem bad baheh tam ki dei ha ka 29 snem ka rta. Kiba ïashim bynta ki dei na ki jaitbynriew bapher bapher, ha kaba 35% kidei kiba ha ka kyrdan Engineering degree bad 65% kim bym dei kiba pule Engineer. Nalor ki undergraduate degree, ba kynthup ruh ïa kiba ïashim bynta kiba ha ka kyrdan master degree kum ka MA, MCom, ME, MS/MSc, MSc-Integrated, bad MTech-Integrated.
Kumba 72% kiba don hapoh ka batch ki dei kiba la don ka jingtip ïa ka kam, bad baroh kiba ïashim bynta ki dei na ki 21 tylli ki jylla bad 2 Union Territory jong kylleng ka India.
Na ka liang u Prof. D P Goyal Director ka IIM Shillong, u la ïaroh da kaba ong ba ka IIM Shillong ka la bat ïa ka kyrdan kum kawei na ki jaka pule ha ki kyrdan pule kiba shalor. Haba kren halor kane ka jingpynrung ïa ki samla pule jong ka 17th batch jong ka PGP 2024-26, u Prof. Goyal u la ai ka jingïaroh ïa kiba ïashim bynta halor ki jingtrei shitom bad ki jingaiti lyngba ki rukom pynrung klas bapher bapher. Shuh shuh u Prof. Goyal u la kdew ba ka Shillong, kaba la tip kum ka pdeng ka pule puthi jong kane ka thaiñ shatei lammihngi, ka la long kawei na ki nongbah kaba don ka jingïada hapoh ka ri. U la banjur ïa ka jingdonkam ka jingsngew shngaiñ ha ka sawdong sawkun.
Ha kine ki 16 snem ba la leit, naduh ba la seng ïa ka ha u snem 2007 kum ka 7th IIM, kane ka jaka pule ka la ïaid bun ki mawmer lyngba ki jingjop bapher bapher. Kane ka jaka pule ka la ïoh ruh bun ki jingithuh da kaba jop ha kiba bun ki national award ba pawnam, halor ki kam pule puthi. Lah ban ong ba ka IIM Shillong ka la lah ruh ban poi ha ka kyrdan kaba hajrong napdeng ki IIM ba paw jong ka ri.
