Ym don shuh ka dheng kali ne khapngiah ha sngi thep kyrteng

Shillong, Rymphang 02 : Ka tnad pyniaid elekshon na bynta kane ka elekshon MDC ha ki constituency jong ka KHADC ka la ioh ia ka jingiaroh na ki paidbah ba bun namar kam shym la don satia ka dheng kali lane ka jingkhapngiah ki lynti syngkien ha ka sngi ba ki kyrtong ki thep kyrteng na bynta kane ka elekshon kaban sa long ha ka 21tarik mynta u bnai.
Ka jingpynbeit bun jaka ban pynlong kum ki jaka thep kyrteng ka la pynsuk, pynkloi bad weng ruh ia ka dheng kali bad jingkhapngiah kaba ju mih ka jingkhnium kaba man ka por na ki nongleit nongwan tang shu poi ki sngi thep kyrteng ki kyrtong.
Lah ban kdew hangne, haba phai ha ki bynta jong ka East Khasi Hills ka tnad elekshon ka la pynbeit ba ka jingthep kyrteng na bynta kiba bun ki constituency la buh ha ISBT Mawiong. Katba ha ophis treikam jong ka Deputy Commissioner East Khasi Hills pat la buh ban thep kyrteng tang na bynta ki lai tylli ki constituency.
Nalorkata la buh thymmai ruh ha ka sien kaba nyngkong eh ban thep kyrteng na bynta ki ar tylli ki constituency jong ka Pynursla bad Langkyrdem-Laitkroh ban thep kyrteng ha ophis treikam jong ka SDO Civil Sub-division kaba don ha Pynursla.
Haba ioh ban kren bad katto katne ki nongtrei party na ki constituency bapher bapher kiba wan ban thep kyrteng ki la ong, “Kane ka jingpyrshang jong ki bor pyniaid elekshon ban pynlong jaka thep kyrteng bun jaka ka la weng ia ka jingkhapngiah bad khamtam eh ka dheng kali kaba ngi ju sakhi ha ki por thep kyrteng ha ki bynta jong ka IGP ter shaduh ophis DC bad shaduh Khyndailad,” ong uwei na ki nongialam party na ka thaiñ Mawsynram ha ka sngi ba ki wan synran thep kyrteng ia u kyrtong.
Uwei pat u Rangbah na Sohryngkham u la ong ba man ka elekshon ki ju ia tyngkhuh para briew ha ka sngi thep kyrteng hynrei mynta ka kynti pat u ong ba ka long jai jai bad kylluid.
U wei pat u Nongialam na Mawkynrew bad katto katne na Mawphlang ki la ong ba ka jingpynlong ia ka jingthep kyrteng ha ISBT Mawiong ka la long kaba paka namar ka jaka ruh kaba kylluid bad ruh ka jaka ïeng kali ruh ka pahuh.
“Kane ka pynsuk ia ki paidbah ba wan synran ia ki kyrtong namar ba heh bad kylluid ka jaka bad kawei pat ki lait na ka dheng kali namar ka dei harud ka surok bah,” ki la ong.
Na ka liang ki nongkyrshan ba wan synran ia ki kyrtong ha ka sngi thep kyrteng ha Pynursla Sub Division ki la ong ba kane ka pynsuk ym tang ia ki kyrtong namar kim donkam shuh ban leit shaduh Shillong hynrei ki la ioh ban pyndep kam tang ha ka thaiñ la jong.
Ka sngi thep kyrteng ba khatduh na bynta ki kyrtong ba aireng ha kane ka elekshon mynta ka kynti ka dei mynta ka sngi ka 03tarik Rymphang katba ka sngi thep vote pat kan long ha ka 21tarik mynta u bnai hi.