Ym don nong Pakistan ha Meghalaya, ka Sorkar ka peitngor bha ïa ka khappud Indo-Bangladesh: Dy. CM

Shillong, Ïaïong, 29: U Symbud Myntri Rangbah ka Jylla uba khmih ïa ka tnat Kam Pohing Bah Prestone Tynsong ha ka sngi Baar ula pynthikna ba ym don satia ki nong Pakistan kiba sah ha ka jylla Meghalaya bad ha kajuh ka por u la ong ruh ba ka Sorkar ka la peitngor bha ïa ka jinglong jingman ha khappud jong ka ri Bangladesh.
Ha ka jingïakren bad ki lad pathai khubor u Bah Tynsong u la ong, “ïa mynta, ym don satia kino kino ki nong Pakistan kiba sah ha Meghalaya.”
U la ïathuh ba ka Sorkar ha ka kyrdan jong u Chief Secretary bad ka Director General of Police ki la ïakren bad ka tnat Border security Sorces (BSF) ïa ka jinglong jingman ha khappud.
“Ïa mynta, baroh ki biang lut nadong shadong. Ngi la peitngor bha ïa ka jinglong jingman ha shilynter ka khappud bad ka ri Bangladesh.”
U Bah Tynsong u la ong ruh ba ka Sorkar ka la bthah da kaba shai ban pynthikna ba ym dei ban don kino kino ki mynder ki ban ïoh rung beain ne rung tuh shapoh u pud u sam jong ka ri India.
“Namarkata, wat na ka liang jong ka Sorkar, ngi ladep ban bthah janai ïa ki nongsynshar shnong ban ïatreilang bad ki bor ïada ri khnang ba ngin dup shngaiñ bad ki mynder kim dei satia ban ïohlad ban rung tuh sha u pud u sam jong ka ri India,” ula bynrap.
Da kaba pynpaw ba ka jingïohkem ïa ki mynder Bangladeshi na ki bynta bapher bapher ka jylla ka la pynsngewkhia bha ïa ka Sorkar, u Symbud Myntri Rangbah u la ong, “kata kaba nga la ong, ngi la shong jingïalang bad ki bor ba dei peit jong ka sorkar jylla bad ka sorkar pdeng bad ngi la peitngor 24kynta bad lada jia eiei, ngi long kiba la khreh ban ïakhun ïa ki jingeh.”
Ha kajuh ka por, u Bah Tynsong u la pyntip ba ka Sorkar ka la pyrshang katba lah ban weng ïa ka jingeh ha kaba ïadei bad ka jingïoh jaka ha ki bynta bym pat ker sainar ha khappud.
“Ngi la ïakren ruh halor kane ka bynta. Ki don ki bynta bym pat lah ban ïa pynbeit. Ka jingeh mynta hangne ka dei jaka. Ki trai khyndew bad teng teng ki bor synshar shnong ki pyrshah lada ngi ïaid katkum ka jingthmu ban shna ïa ka jingker sainar namarba ka jaka ba shi lyngkhot kan hap shabar ka jingker bad kan kylla long ka jaka bym lah ban kam mano mano ruh,” u la ong.
“Namarkata,ngi dang ïakhun ïa kane ka bynta, ha kaba ngi ïakynduh jingeh bad nga ngeit ba ki Deputy Commissioner ba dei peit ki la leh la ka jong ka kamram ban ïakren bad ki trai khyndew kynthup ruh ki bor synshar shnong ban wanrah sha ka jingïasngewthuh jingmut,” bynrap u Bah Tynsong.