Ym don jingthmu ka Sorkar ban aiwai noh sha ki kynhun shimet ïa ka MeECL: Mondal

0

Shillong, K’ Lyngkot 23: U Myntri ka sorkar jylla uba khmih ïa ka tnad Bording u Abu Taher Mondal ha ka sngi Palei, ula ong ba kam don satia kano kano ka jingthmu na ka liang jong ka Sorkar ban aiwai noh sha ki kynhun shimet ïa ka Meghalaya Energy Corporation Limited (MeECL).
Kane ka jingkren ka la mih hadien ba ka kynhun ki nongïalam ka Khun Hynñiewtrep National Awakening Movement (KHNAM) ka la pan jingpynshai halor kane ka kam.
“Haba phai sha ka jingaiwai noh sha ki kynhun shimet ïa ka MeECL, ïa mynta hi kam don satia kaba kum kata ka jingpyrkhat,” ong u Mondal haba ïakren bad ki nongthoh khubor hadien ka jingïalang.
“Ngi dang trei shitom ban ïohi ba ka MeECL kan khie khlieh bad pyllait na baroh ki jingeh ba ka ïakynduh bad ka pla tyngka jong ka mynta ka la kham biang. Halor ki kam u paidbah haba ïadei bad ka jingsam bording, ka jingtan bad jingpynmih bording ruh ka la kham khlaiñ khnang ba ka MeECL kan don ha ka jaka kaba biang,” u la ong.
U Myntri u pyntip ba ka dei ka jingshisha ba mynshuwa, saw tylli ki sub division la shu ai wai sha ki artylli ki kompeni-kawei ka dei ka Chicomputer kaba khmih ïa ka Dalu bad ka FEDCO kaba khmih ïa ka Phulbari Nangal bad Mawsynram.
“Ïa mynta, ka jingtreikam jong ka Chicomputer ka biang bha. Kim don satia ki jingpynsah ïa ka jingsiew. Hynrei ngi kham khuslai khyndiat haba phai sha ka FEDCO namar ka pynsah ïa ki jingsiew bad ngi la dep phah show cause notice sha u pud ban shim noh da ki lynti ka aiñ pyrshah ïa ki lane ban weng syndon ïa ki na ka kam. Baroh kine ki kam ki la ïaid hynrei kine ki kam ki dei tang halor ka jinglum ïa ki bill bording” ula ong.
Haba ïadei bad ka kam Smart Meter, u Mondal ula ong ba kane ka dei ka rai jong ka Sorkar Pdeng bad ka Ministry of Power ban ai ïa ki smart meter sha baroh ki Jylla bad baroh ki Jylla ki la jam shakhmat bad ka project. “Ngi ruh ngi dang bud ïa ki jingbthah jong ka Tnad Bording,” ula bynrap.
Ha kaba ïadei bad kane ha shuwa kane haba ïakren bad ki nongthoh khubor, u Working President ka KHNAM Bah Thomas Passah ula ong, ” La pyntip sha ngi ba ka Sorkar Jylla ka la jam shakhmat ban aiwai noh sha ki riew shimet ïa ka kam pynmih bording hapoh ka Jylla. Ngi tip ba ka Sorkar ka la dep aiwai ïa lai tylli ki centre. Ngim kwah satia ban aiwai ïa baroh ka kam pynmih bording sha ki kompani shimet namar ngi sheptieng ïoh ki nongthang bording ka Jylla kin hap mad ïa ki jingkit kaba khia ha ka pisa pilaiñ lada aiwai ‘a ka kam pynmih bad sam bording”.
U Bah Passah ula pyntip ba ka kynhun ka la rah ban ïakren ruh ïa ka kam ba ïadei bad ka dor jong ki smart meter.

Leave A Reply

Your email address will not be published.