Shillong, Jymmang 14 : U MDC shimet na Laban – Mawprem, Bah Ricky Shullai ha ka sngi Palei u la ong ba kam myntoi shuh ban ïoh ne pan skim lada na ka liang ka Sorkar Pdeng kam ithuh ïa u pud jong ka KHADC ha ka jingpyntreikam ïa ka skim 15th Finance Commission ha ki constituency sor.
Haba kren bad ki lad pathai khubor hadien ba u la dep ïa kynduh bad u Symbud Myntri Rangbah ka Jylla, Bah Prestone Tynsong, une u MDC u la ong ruh ba da ka jingpyntreikam mynta ïa ka portal bun ki jaka ba hap ha ki constituency sor kim ïoh shuh ïa ka jingithuh na ka sorkar pdeng ban ïoh ïa ki skim.
“Kumba nga la dep ban rah ha ka Dorbar ba la dep halor ka jingbym ithuh bad ka jingbym shem jong ka portal jong ka sorkar pdeng ne ka geotagging ba ki ong mynta, ngi ïohi mynta ba bun ka skim kaba wan khamtam na ka 15th Finance, ngi lei ba hap ha sor ngim ïoh ïa ka skim. Kum manga lei baroh kawei ka constituency ngam ïoh skim shuh namar ba dei tang ka Lawsohtun kaba hap sha Rural,” u la ong.
Nangta u ong ruh ba ka jingwan jong u kam dei eh halor ka skim hynrei kaba kongsan ka long ba watla ki District Council ki la ïoh ïa ka jingithuh na ka Riti Synshar jong ka Ri hynrei ka portal ba wanrah da ka Ministry of Finance kam ithuh satia. “Ha kato ka portal ïa ka panchayat la ithuh bad la lah ban bat da ka portal, ïa ka municipal bad ruh ïa ka rural. Hynrei hangne pat ba ngim don ïa ka panchayat bad ngim don ward member ngi don da ka Sixth Schedule ïangi pat ka portal kam kem bad kumta kum ki MDC ha sor ngi shem jingeh ban ïoh ïa ka skim na ka 15th Finance.
U ong ruh ba lada ka Sorkar Pdeng kam ithuh ïa ki, kan ym don jingmut shuh ban ïoh ïa ka skim. “Nyngkong ngi jop ïa ka elekshon MDC ka long ban ïada ïa ka khyndew ka shyiap ïa ka riti dustur bad ka khaii pateng. Kumta, ka jingwan jongnga ka long ban ïoh shwa ïa ka jingïada bad ka jingithuh naka sorkar pdeng bad sa shim pat ïa ka skim hadien.”
U la ïathuh ruh ba ha ka jingïakren ula kyntu ïa u Symbud Myntri Rangbah ban thoh sha ka Ministry halor kane bad pynpaw ruh ka jingkyrmen ba u Symbud Myntri Rangbah ban shimkhia halor kane.
Katkum ka jingïathuh da u MDC, ki MDC kim donkam shuh ban leit shim skim na ka Municipal hynrei kin ïoh beit na ka District Council kumba ju long mynshwa ha ka por ba ym pat ju don ka geotagging ne ka PFMS.
