Shillong, Nailar 17 :U President ka BJP, u Bah Ernest Mawrie ha ka sngi Balang u la ong ba ym shym la don mano mano ruh kiba dawa ban weng noh ïa u kum u President.
“Ym don satia kiba dawa ban weng noh ïanga kum u President,” ong u Bah Mawrie haba kren bad ki lad pathai khubor. U ong ruh ba ka jingkren halor ka jingthmu jong ka party ban weng ïa u na ka shuki kadei kaba kren da u Incharge jong ka Meghalaya u Dr. Chuba Ao.
Da kaba kyntait ban kren shuh shuh halor katei ka bynta, u Bah Mawrie u la ong ba u la dep ban phah ïa ka kaiphod bad ka shong mynta sa ha ki bor bahalor ka party ban leh ïa kaba donkam.
“Ki la kren bad nga hynin k asngi bad nga la dep ruh ban phah ïa ka kaiphod halor ki jingthoh ba mih ha ki lad pathai khubor, ki la dep ruh ban kular ban leh ïa kaba donkam. Kumta, ngam lah ban ai kano kano ka jingkynthoh palat na kata,” u ong.
Utei u heh ka party u ong ruh ba kaei kaba jia kadei ka kam pohiing jong ka party. Da kaba kyntait ba ka don ka thma pohiing, u Bah Mawrie u ong ruh ba ki ïatylli kawei tang um lah pat ban khanglad ia kano kano ka jingïohi shimet jongno jongno namar ki don ka hok ban pynpaw ïa jingsngew jongki.
Da kaba pynpaw ba ka samoi treikam jong u kan kut noh ha u 2023, utei u President ka BJP u ong ruh ba ka shong pat mynta ha ki bor bahalor jong ka party la kin rai ba un bteng biang lane un resaiñ noh.
