Shillong, Nailar, 21: U Chief Secretary ka Meghalaya, u Bah DP Wahlang, IAS, u la kyntu ïa ki ophisar ba kim dei ban tieng satia ïa ki jingbym lah treikam ne ki jingpulom (failures) ha ka jingtreikam.
Haba kren ha ka jingïalang ba shisien shi snem jong ka Meghalaya Civil Services Officers’ Association (MCSOA) kaba la long mynta ka sngi ha State Convention Centre, u hehduh ki ophisar ha ka jylla, u la ong ba ka jingbym lah treikam ne ka jingbym biang ka dei shi bynta ha ka jingtreikam ki ophisar. “Ha ka jaka ba ngin tieng, ngi dei ban tur shakhmat bad ban nang trei khambha shuh shuh na ka bynta ka bit ka biang jong ki paidbah”, u la ong.
Ha kajuh ka por u la ban ïa ka jingdonkam ban pyntbit ïalade ha ka jingtreikam, khamtam ha kane ka juk kaba ka jingtreikam ka bun da ki kor ki bor ne ka digitisation. “Ngi hap ban pynmlien bad pyntbit ïalade katkum ka jingkylla jong ka por”, u la ong.
Kum u ophisar ba rangbah duh jong ka jylla, u Bah Wahlang, u la sneng bad kyntu ïa ki ophisar baroh ba kin lon kiba bha mynsiem bad long jai jai haba ki paidbah ki wan donkam sha ki ophis jong ki. “Ngi dei ban long borabor kiba jem nud, kiba kloi ban ïarap ïa ki jingeh ba ki paidbah ki wan ïathuh ha ngi”, u la ong.
U la kyntu ruh ïa ki ophisar kiba dang kham khynnah ba kin sngewthuh kumno ban kynshew lypa khnang ban suk ynda la shongthait bad ym dei ruh ban klet ïa ka jingkoit jingkhiah ha ka met jong ki.
Kiwei pat kiba la kren ha kane ka jingïalang ki long Dr Vijay Kumar, Commissioner of Division for Garo Hills, u Bah C V D Diengdoh, Secretary Personnel and AR Department.
