Ym dei ban tei pop ïa ka sorkar jylla halor ka ishu Aadhar, pynshai ka Myntri Sorkar

Shillong, Ïaiong 09 : Ka Myntri Sorkar ka Jylla kaba dei ruh ka nongai ktien jong ka sorkar, ka Dr. M Ampareen Lyngdoh ha ka sngi Balang ka la ong ba ym dei satia ban shu tei pop ïa ka sorkar jylla halor ka ishu kaba ïadei bad ka jingpynïasoh bad u Aadhar.
Haba kren bad ki lad pathai khubor, ka Myntri ka la ong ba kam ïahap satia ban shu kynnoh ne tei pop ia ka sorkar jylla haba ïadei bad ka jingphah pynïasoh Aadhar na ka bynta ban ïoh jingmyntoi ïa ki skim sorkar.
Da kaba pynshai halor ka jingïakhih ban pyrshah pynïasoh Aadhar, ka Myntri ka la ong, “La pyntip ïanga da ka DC ba don katto katne ki kynhun kiba pyrshah ïa ka jingpynïasoh Aadhar. Nyngkong ka long ka bym ïahap ban kynnoh ïa kane ka jingeh ïa ka sorkar MDA – 1 lane MDA-2 lane kino kino ki seng saiñ pyrthei. Ïa ka kam ba dei bad u Aadhar la mynjur da ka Parliament bad long aiñ kumta ka jingpynïasoh ïa u Aadhar ka dei ka kam kaba long palat ïa ka bor jong ka sorkar Meghalaya.”
Ka Myntri ka la pynkynmaw ruh da kaba ong ba ha u snem 2016-17 ka sorkar jylla ka la thoh sha ka sorkar India ban pyllait noh ïa ka jylla na ka jingpyntreikam ïa u Aadhar ha ka jylla Meghalaya. “Hynrei ka sorkar India ka sngap jar jar bad dei hadien sa tip pat ba ka jingpynïasoh ïa u Aadhar kadei na ka bynta ban ïoh ïa kiba bun ki skim jingmyntoi kum ka rashon, job card bad mynta wat ban pynïasoh ïa ka MHIS nalor kiwei kiwei ki skim,” ka la ong.
Ka Myntri ka la ong ruh ba ki paidbah ki lah ban jied la ki kwah ne kim kwah hynrei lada ki kwah ban ïoh rashon lane ïa ka MHIS card ki hap ban pynïasoh Aadhar. “Lada phi dei ki samla pule ba aplai ïa ka scholarship phi hap ban donkam Aadhar. Kumta ka sorkar India ka la pyndonkam ïa u Aadhar kum ka thup pynshisha ïa ka jinglong tynrai nong India,” bynrap biang ka Myntri.
Ha kawei pat ka liang, ka Myntri ka la kyntu ïa kito kiba pyrshah ba ki dei ban thoh sha ki bor badei peit halor kane ka jingpyrshah jong ki ïa u Aadhar.
“Ki don ki bor ba dei peit na ka bynta kito kiba ym ïahap bad u Aadhar, phi lah ban thoh sha ki bor kiba dei,” ka la ong.