Kynshi, Nailar 08: U Bah HB Nongsiej, MLA jong ka Mawthadraishan bad Myntri ka sorkar jylla, u la wer ïa ki Sordar Shnong, ki Rangbah Shnong bad ki Nongïalam Niam ban ïatreilang na ka bynta ban kyntu ïa ki Shnong ban nym ai NOC ban plie ïa ki Wine Store ha Mawthadraishan Constituency lane ha Eastern West Khasi Hills District bad ha ka jylla hi baroh kawei.
Haba kren kum u Kongsan ha ka Awareness Programme ba ka pynlong da ka Jingiaseng Samla Kynshi District Presbyterian Youth Centre kaba la long mynta ka sngi ha Kynshi Mawria, u Bah Nongsiej, u la ong ruh ba ka sorkar kam lah ban plie ne phah plie Wine Store lada ki Dorbar Shnong kim ai ïa ka No Objection Certificate.
Ka Jingiaseng Samla Kynshi District Presbyterian Youth Centre, ka la pynlong ïa kane ka Awareness Programme halor ka jingma kaba ap bad ktah na ka jingdih drok bad kiwei kiwei pat ki jingdih ba sniew ha Kynshi Mawria, kaba dei artad ka sngi ïew Kynshi.
Ha kine ki sngi kiba ladep na ka liang ki bor pynïaid District jong ka Eastern West Khasi Hills District ka la khot ïa ka jingïalang jong ki Sordar jong ki Shnong kiba don hapoh ka National Highway jong ka District na ka bynta ban ïakren ïa ka jingplie Wine Store ha ka District bad phah shithi ruh sha ki Shnong ban ïakren bniah ïa kane ka kam.
“Haduh mynta ngim pat don kano kano ka Wine Store ha Eastern West Khasi Hills District bad ngim sngewdei hi ruh ban don namar ka jingdon ki Wine Store ka wanrah ka jingeh ïa ki khun samla bad ïa ki shnong ki thaw hi baroh kawei. Namarkata nga kyntu ïa ki Sordar, ki Rangbah Shnong ban ïatreilang ban nym ai NoC”, la ong u MLA ka Mawthadrai
Ha kajuh ka por u khot u wer ruh ïa ki kmie ki kpa ban peit bha ïa ki kmie ki kpa ban peit bha ïa ki khun ki kti khamtam ki khun shynrang khnang ba kin laiy=t na ki jingdih ba sniew. U kyntu ruh ïa ki Samla ban kiar raimaw raidieng na u drok, ka kyiad bad kiwei kiwei de ki jingdih ba sniew.
Ha kane ka jingïalang pynsngewthuh ïa ki jingma bad ki jingktah na u drok bad kiwei kiwei ki jingdih ba sniew, la ïoh ruh ïa ka jingbatai kaba kham bniah na i Dr. ka Kynshi PHC, iba la batai ba kumno ka jingmlien ban dih ïa u drok ka ktah ïa ka bor pyrkhat jong ki briew. Nangta la ïoh jingbatai ruh na ki dkhot ka Alcoholics Anonymous ba kumno lah ban lait na ki jingkyrni na ki jingdih ba sniew.
U Rev. AI Kharshiing u la ai ka jingkren na ka liang ka District, u la khot u la wer ïa ki samla, ki longkpa bad kiwei kiwei pat ban phai sha U Blei ban ïoh ïa ka jingïarap, ka jingpynshai ban lait na ki jingdih ba sniew.
Ïa ka jingïalang la pynïaid da u T. Bn Aiban Syiemlieh, President jong ka Youth Centre bad la ïoh ruh ïa ka jingduwai na i Kong D. Nongsiej bad jingrwai na i Ibaniaisara Syiemlieh bad ki Paralok.
