Shillong, Risaw, 27: Ka FKJGP Garo Hills Zone ka la kyrpad ïa baroh ki samla Garo kiba shong basah ha nongbah Shillong ban ïashim bynta lang ha ka Public Rally ka ban sa long ha ka 28 tarik mynta u bnai ha ka por 11:00 baje mynstep na Motphran sha madan Iewrynghep, Laitumkhrah bad ban sa pynbud da ka jingïalang na ka bynta ban pynshai ha kaba ïadei bad ka jingim kordit jong ki samla kane ka jylla ha ka ïohkam ïohjam.
Ka seng ka ïohi ba ka Sorkar kam shym la shimkhia eiei ban kyntiew ïa ka ïohkam ïohjam jong ki samla ha kane ka jylla kat haduh ba ka la ktah ïa ki samla bad ki bym don lad shuh da kumwei pat ban leh ïa kino kino ki jait kam tang ban im, ong u President ka Seng u Pritam Arengh ha u kyrwoh ba la phah sha ki lad pathai khubor.
“Ka long kaba sngewsangsot ba ki samla kiba long ka lawei jong ka imlang ka sahlang kim ïohlad ban pynpaw pyrthei ïa la ki sap ki phong bad ban ïoh ïa ka jaka kaba dei hok ha ka imlang ka sahlang. Namarkata, ki samla ki donhok ban dawa ïa kaba kim shym la ïoh, bad ban dawa ïa kaei kaba dei hok ka jong ki katkum ka riti synshar paidbah,” ong une u nongïalam ka seng.
Kane ka rally bad ka jingïalang paidbah ban sa pynlong da ka FKGJP kan long kum ka sakhi ba ki samla kim dei satia ban shah ieh shadien lada kano kano ka sorkar ka phiel ban ai ïa kaei kaba dei hok ka jong ki, ong Arengh.
Ka FKJGP Garo Hills Zone kan sa pynlong ïa kane kajuh ka jingïakhih ha ki bynta bapher bapher ka rilum Garo ha ki sngi ki ban sa wan tad haduh ba ka Sorkar kan da plié ïa ki lad aikam ïa ki samla, la bynrap shuh shuh u Arengh.
