Weng noh mardor ïa ka Beat House jong ka Assam na Mukroh, dawa ka Dorbar Shnong

Shillong, Naiwieng 27 : Ka Dorbar Shnong Mukroh, West Jaintia Hills ka la dawa na ka sorkar jylla ba kadei ban weng noh mardor ïa ka forest beat house jong ka Assam na katei ka shnong bad ruh ban buh noh da ka police outpost kaban ïada ïa ki nongshong shnong kiba don ha katei ka shnong ba don ha khappud bad ka Assam.
“Ngi dawa na u Myntri Rangbah ka jylla, Conrad K Sangma bad ka sorkar jong u ban pynstet tei noh ïa ka police outpost ha ka shnong Mukroh, lym kumta ngin ym lah shuh ban im ha ka suk ka saiñ,” ong u waheh shnong ka Mukroh, u Hamboide Sumar haba kren bad ki lad pathai khubor ha ka janmiet sngi Saitjain.
Shuh shuh u ong ruh ba ki dawa ruh ïa ka sorkar jylla ba kadei ban weng noh shi syndon ïa ka forest beat house jong ka Assam kaba don ha Mukroh namar kadei ka tyllong jong baroh ki jingkulmar ba ki paidbah kiba sah ha khappud ki kynduh.
U Waheh Shnong u la pyntip ruh ba ka Dorbar Shnong ka la rai ruh ban kyntait ïa ka rai jong ka Assam ban siew ïa ka bai luksan sha ki bahaiing jong ki san ngut ki Khasi kiba la khlad ha ka jingsiat ki pulit Assam ha ka 22tarik mynta u bnai.
“Ngi pyrshah jur ïa kane ka rai jong ka sorkar Assam bad ngin ym pdiang satia ïa katei ka bai luksan kaba ka tyrwa,” u la ong.
Nalorkata, u la ïathuh ruh ba ka Dorbar Shnong ka la pynpaw ruh ïa ka jingpyrshah kaba jur ïa ka jingthmu ka sorkar Assam ban pynieng ïa u mot dur jong u forest guard uba la khlad lang ha katei ka jingshah siat, ha ka shnong Mukroh.
“Ngi ryngkat bad ki bahaiing ha sem jong kitei kiba duh noh ïa ki baieit ba thoin ha katei ka jingshah siat, ngi dawa na u Myntri Rangbah bad ka sorkar Meghalaya ba kan leh da kaba tyngeh pyrshah ïa ki pulit Assam bad Forest Guard kiba la donkti ha katei ka jingsiat,” u la bynrap biang. U ong ruh ba kam don satia ka jingshisha ha ka jingkynnoh da ki pulit Assam bad forest guard ba ki paidbah ki la wan bad ki tiar pynmynsaw ha ka 22tarik mynta u bnai.
“Ki paidbah jongngi ki khlem rah satia ïa ki tiar pynmynsaw ha katei ka sngi hynrei ka jingshisha ka long ba ki pulit Assam ki la pynïap ïa la u jong u para lok ha katei ka kam,” ong utei u nongïalam shnong.
Shuh shuh u ong ruh ba ka shnong Mukroh ka hap ha West Jaintia Hills Distrik jong ka Meghalaya bad kam hap satia ha ka jaka kajia jong ka Block -I kumba la kam da ka Assam. “Ngi don ïa baroh ki kot ki sla ban pynskhem ïa ka jingkam ba ka Mukroh ka hap ha Meghalaya hapoh u pud u sam jong ka Jaintia Hills Autonomous District Council (JHADC),” u bynrap biang bad ong ruh ba ka Mukroh ka hap ha Nartiang police station ym kumba la kam da ki pulit Assam ba ka hap ha Jirikinding police station.
Shuh shuh u la ïathuh ba katei ka jingjia ha ka 22tarik kadei ha ka sngi ba ki paidbah ki leit ban dawa pyllait noh ïa ki lai ngut ki nongrep ba shah kem ha ki pulit Assam bad forest guard. Hynrei ki pulit Assam khlem da ai jingmaham ki la khyrwit kuli pathar ïa ki paidbah haduh ba hynriew ngut ki la khlad. U ong ruh ba kane kam dei shuh ka sien kaba nyngkong ba ki paid Khasi ki la shah pynïap ha ki pulit Assam bad kane baroh kadei namar ka jingbym lah jong ka sorkar Meghalaya ban shimkhïa bad khamtam eh ka jingslem ban buh ïa ka ktem pulit ha khappud.