Nongstoiñ, K’lyngkot, 18: Ka Mawshynrut Youth Movement (MYM) hapoh ka jinglamkhmat jong I Bah Shem Rynñiaw kum u President bad u Bah Pyndap Wanniang kum u General Secretary, ki la leit ïakynduh ïa u SDO Civil Sub Division Mawshynrut ban dawa ban weng noh shwa ïa ki nongtrei casual/wages kiba shu thung sop sop naduh u snem 2018 khlem da pynbna paidbah.
Ki nongïalam ki la kren shai ruh ba bad nangne sha khmat dei ban da pynbna paidbah, lada don kino kino ki kam kiba lait hapoh jong ka Mawshynrut bad ban mang kyrpang ïa ki post ba lait na bynta kiba duna dkhot met.
U Bah Thabah u Ophisar ba dei peit na ka bynta ka Civil Sub Division, u la kular ban pynbna paidbah lane pynmih advertisement nangne shakhmat, da kaba wah ha ki kynroh ‘Notice board’ jong ki department bapher bapher.
