Shillong/ Khliehriat, Nailar 29: Ka Meghalaya Cements Limited (MCL) kaba dei ka Kompeni ba pynmih ïa ka dewbilat Topcem, ka la weng kam noh ïa ki arngut ki nongtrei jong ka, kiba la donkti ha kaba pynshit ïa ki Pulit ban bom ban tied ïa ki paidbah kiba la ïakhih pyrshah ha ka por ba pynlong ïa ka Public Hearing ha Thangskai ha ka 24 tarik mynta u bnai.
Katkum ka kyrwoh ba la phah da ka HR Department jong ka MCL, la ong ba kine ki arngut kiba la shah weng kam ki long u Arun Kejriwal bad u Umesh Kumar. Hynrei ka kyrwoh kam shym la kdew ba ki bat ïa ka post aiu, hynrei la shu pynpaw ba la weng kam noh ïa ki.
Lah ban kdew hangne ba ha katei ka 24 tarik la paw lyngba ki Video ba la don arngut ki briew kiba la rangbah bha bad kiba la suba ba kidei ki nongtrei ka MCL, ki la pynshit ïa ki Pulit da kaba pyndonkam ruh da ki kyntien kiba khlem akor ban bom bad tied bad ban pynkut noh ïa ki paidbah kiba la ïatur sha karkhana jong ka MCL ban pyrshah ïa ka Public Hearing ba la pynlong da ka Meghalaya State Pollution Control Board na ka bynta ban pynheh ia ka jingtreikam ka MCL.
Kane ka jingkam ka MCL ba ka la weng kam ïa kine ki arngut ka long hadien ba ka la mih ka jingpynrem bad ka jingdawa na ki nongtrei ka Topcem ha East Jaiñtia Hills ban weng kam noh ïa kine ki arngut. Nangta na ka liang ka HITo East Jaiñtia Hills ka la ujor da ka ejahar pyrshah ïa kine ki arngut ki nongtrei. Hadien kane ka HITo Central Body, ka HYC West Khasi Hills bad ka HYC Eastern West Khasi Hills, ki la khot ïa ki paidbah ban boycott ïa ka dewbilat bad kiwei de ki jingmih jong ka MCL.
