Watla thep kol u Messi, dang shah rem ka Inter Miami ha ka Al-Hilal

K’Lyngkot 30 : Ka kynhun ïalehkai ba bna nam ha ka pyrthei da ka jingdon u Lionell Messi ka la sdang ïa ka jingïakhun pynkhreh jong ka ha Saudi Arabia tangba ha kane ka lympung ka la mad pat ïa ka nam rem da kaba shah rem haduh 4-3 kol ha ka Al –Hilal ha kane ka sngi Nyngkong.
Katei ka kynhun ïalehkai ha ka Major League Soccer ka la ïoh lad ban ïakhun artylli ki jingïalehkai ha katei ka ri ba riewspah kum shi bynta ban pynkhreh pat na ka bynta ka samoi ïalehkai kaban wan, tangba kam shym la lah pat ban ai jingkyrmen lane ban jop ha kane ka jingleit jong ka ha Riyadh.
Watla u Messi u la ïoh ban pynkhih jar ha ka kylla miet lyngba ka penalty, hynrei u Malcom u la ïoh ban thep ïa ka kol rai jop ïa ka kynhun ha ka minit kaba 88 jong katei ka kylla miet hi.
Hab phai sha ka jingiakhun, ka Al-Hilal kam dei satia ka kynhun kaba lah ban kheinsting bad kadei ruh kawei na ki kynhun kaba la khroh bha ïa u Messi ban wan ïalehkai noh na ka hadien ba utei u khlur ïalehkai ba pawnam ha ka pyrthei u la mih noh na ka Paris Saint German ha u snem ba ladep.
Tangba, utei u rangïalehkai pat u la jied da ka mon lajong ban leit ïalehkai noh na ka klob jong ka United States kaba long trai da u David Beckham ha kaba u la lah ruh ban pynlong ïa katei ka kynhun ban rah ïa ka nam lahduh ha ka Leagues Cupha ka sien kaba nyngkong eh.
Ka Miami ka don ruh ka jingkyrmen ba ryngkat bad u Messi kin lah ban khur bïang ïa ka nam lahduh ha ka samoi kaban wan bad dei na kane kadaw kum shi bynta ban pynkhreh, ki la leit ban ïalehkai paralok sha Saudi Arabia, nangta sha Hongkong bad ruh sha ka ri Japan.
Ka jingïakhun kaban dei ruh ka jingïalehkai kaba shongshit tam ha ka pyrthei kan dei ha kane ka sngi Palei ha kaba ka kynhun jong u Cristïano Ronaldo ka Al Nasser kan kynduh aireng bad ka Miami hapoh ka jingïalam jong u Messi.
Khyndiat haba phai biang sha ka jingïakhun ha kane ka sngi Nyngkong, u rangthep kol barim Fulham u Aleksandar Mitrovic u la ïoh ban thep ïa ka kol ba nyngkong na bynta ka Al Hilal ha ka minit kaba 10 jong ka kylla step katba u Abdullah Al Hamdan pat u la ïoh ban thep ïa ka kol kaba ar hadien lai minit.
Ka jingïalehkai ka la nang itynnad hadien ba uwei pat u khlur ïalehkai jong ka Miami, u Luis Saurez ula ïoh ban thep ïa ka kol kaba nyngkong bud pat sa ka kol na u Michael ban pynïakhaid ïa ka jingïakhun ha ka minit kaba 44 jong ka kylla step.
Dei lyngba ka kol kaba wan na u Messi ha ka minit kaba 54 ba ka jingïakhun ka shongshit shipor. Hynrei hangne ruh ka jingïalehkai ka la thnem da ka jingïoh jong u David Ruiz ban pynïakhaid biang ïa ka jingthep kol tang hadien shiminit.
Kumta dei ha ka por ba baroh arliang ki la nang tharai ba ka jingïakhun hapdeng madan kan kut noh da ka jingïakhaid mar 3-3 kol ba u Malcom u la ïoh ban thep ïa ka kol kaba kongsan tam bad pynjew slew ïa u Messi bad ka kynhun baroh kawei ha ka minit kaba 88.