Watla ngi dei ka jaitbynriew barit, hynrei ngi la pynmih ïa ki longkmie bakhraw : Bah Process

Shillong, Lber 17 : U Bah Process T Sawkmie, President ka Mawlai Constituency Progressive Forum (MCPF), uba dei ruh u MLA barim ha ka sngi Thohdieng ka 15 tarik u Lber, 2024 u la leit ïakynduh kyrpang ïa I Dr Helen Giri Syiem ha ïingsah jong I ha Mawlai Mawroh.
Ha kane ka jingïakynduh u la ai khublei bad kitbok kitrwiang ïa i halor ka jingïohpdiang jong i ïa ka khusnam Sangeet Natak Akademi Award naka bynta u snem 2023 na ka kti jong ka President ka ri India ka Droupadi Murmu kaba la pynkup burom ïa i ha ka prokram ba la pynlong hapoh ka Vigyan Bhawan, New Delhi dang shen.
I Dr Helen i la ïoh ïa kane ka khusnam halor ka jinglah jong i ban kyntiew bad ban pynpaw nam ïa ki rukom tem bad rukom put tynrai ka Meghalaya.
Kum shi bynta ban pynpaw ïa ka dak jong jingsngewkmen bad sngewburom ïa i u bah PT Sawkmie u la ai ruh ïa I jingai sngewbha sha I Dr Helen
Haba kren halor jong I, u bah Sawkmie u la pynpaw, ba watla ki dang dei tang ka jaitbynriew ba dangrit, hynrei ki la lah ban sei ïa ki longkmie bakhraw na kane ka jylla jong ngi kiba la ïoh jingithuh bad ïoh khusnam na ka por sha ka por na ki President bapher bapher jongka ri.
U la pynpaw ruh ia ka jingsngewkmen bad jingsngewsarong ba Ine i longkmie na ka thain Mawlai i la ïoh kat kane ka jingithuh ha ka sorkar India.
U la pyrto ïa ka jingtrei shitom jong I Dr Helen wat haduh kine ki sngi na ka bynta ban pynneh pynsah ïa ka riti dustur jong u Khasi lyngba ki tiar tynrai.
U la kyntu ïa ki khun samla ba kin bud ïa ka nuksa jong I ban long kiba trei shitom wat hapdeng bun ki mawjynthud ha ka jingïaid lynti ha ka jingim da kaba ïaishah bad dem minot ban pynurlong ïa ki thong ba ki don.