Watla matlah ki khmat hakhmat ka duwan pyndep ki shijur ïa ka jingkyntiew kurim
![](https://mawphor.com/wp-content/uploads/2024/02/iathoh-para-bym-iohi.jpeg)
Nongpoh, Rymphang 10: Ka long kaei kaei ka khubor ba bha bad ka nuksa kaba bha tam ïa ngi kiba biang ha ka ka liang ka dkhot met kumba la ai kyrpang da u Blei bad ka long ka khubor kaba ai jingkmen ha kaba ki shijur wat la kim iohi bad matlah ki khmat ba ki shim pat ïa kata ka rai rangbag da kaba pynlong ïa ka jingkyntiew kurim kaba phuh ba phieng bad ban shim ïa kata ka rai na ka bynta ban saindur ïa ka longïing longsem ba thymmai.
Kane ka la paw pyrthei ha ki shijur ki samla ba kynthup ïa u Samla Gabriel Nongrum na ka shnong Umskun, Ri Bhoi bad ka samla Namita Haloi na ka jylla Assam, ha kaba baroh ar ngut kim iohi satia ki khmat bad ki kloi pat ban shim ïa ka lyngkor kum ka kmie bad u kpa ban saiñdur ïa ka ïing ka sem ba thymmai da kaba ki la pyndep ïa ka jingkyntiew kurim kaba phuh ba phieng bad kaba don burom.
Kine ki shijur ki la pynlyngoh ngaiñ ïa kiba bun balang ha Ri Bhoi bad lah ruh ban ong wat ha ka jylla bad ka ri hi baroh kawei, namar kum ki samla ba la ieh bha ha ka jingmut jingpyrkhat bad wat la kim lah ban iohi ki khmat, ki la pyndep ïa ka jingkyntiew kurim ha ka 9 tarik u Rymphang 2024 ha Nongpoh Parish, ha kaba u Fr. James Mani u la pyndep ïa ka niam ka rukom lyngba ka mass kyntiew kurim ba kine ki shijur ki shim ïa kata jingsmai ban long kawei la ha ka pang ka shitom, ha ka suk ka saiñ ne ha kino kino ki bynta ban ïa kynduh ha ka jingïaid lynti jong ka jingim.
Haba pynrep ïa ka ñiam ka rukom jong ka mass kyntiew kurim la sakhi lang ruh da ka jingdon lang u Parish Priest ka Nongpoh parish, u Fr, Peter Syiemlieh, ki Sister bad kynthup ki kha ki man, kiba haïing ha sem bad ki lok ki jor kiba la wan ban synran ïa kane ka shijur na ka bynta ban pyndep ïa katei ka jingkyntiew kurim kaba shongkun bad shongkha wat la kim lah ban iohi ïa ki khmat briew jongki.
Kum ban pynpaw pyrthei, halor ka sap ba la ai kyrpang da u Blei, kine ki shijur wat lada kim lah ban iohi ki khmat, hynrei ki dei kiba la nang la stad bad ki don ruh ha ki kam ki jam, ha kaba u Samla Gabriel u la trei kum u Accessibility Tester ha IT Sector jong ka Kompani Barrier Break ha Mumbai, ba u trei online na Bangalore bad ka samla Namika Haloi ka trei kum ka Customer Care Executive jong ka Kompani Vindhya E Info Media Private Limited, Bangalore.
Haba phai pat sha ka jingsdang ban ïa don kata ka jingïadei ka dei naduh u snem 2019 ba ka Samla Namika Haloi ka dei kaba ieit ïa u kum u rangïalehkai phutbol ha Bangalore bad suki suki ki la ïa kynduh bad ki la don ka jingïadei tad haduh ba ki la shim ïa ka rai rangbah ban ïa long lang kawei na ka bynta ban tei ïa ka longïing longsem kaba thymmai kumba long lem kiwei wat la ki don kata ka jingduna ha ki dkhot met na ka daw ba kim lah ban iohi.
Haba ïa kren bad ki Nongthoh Khubor, halor kane ka kam kyntiew kurim kine ki shijur, u Samla Gabriel Nongrum bad ka Samla Namika Haloi, ki la phla ba kane ka jingshim rai jongki ban ïa long lang kawei na ka bynta ban tei ïa ka ïing ka sem ka dei ka rai rangbah kaba ki la shim rai hi baroh ar ngut bad ym shym la don mano mano ruh ban pynbor ïa ki ban shim ïa kane ka kam shongkha shongman.
Ki la ong ruh ba wat la kim iohi ki khmat ne ki don ïa ka jingduna ha ka dkhot met bad ki long lang hi kumjuh kumba long lem kiwei kiba biang ha ka dkhot met bad kane ka jingshim rai ban shongkha shongman ka dei hi ka bynt jong ka longbriew man briew ba kum ki samla kim don kano kano ka jingbabe ne artatien bad ki kloi ban ïa long lang kawei ka longing longsem kaba ki angnud ba u Blei un ai ïa kata ka jingkyrkhu kyrdoh.
Na ka liang u Samla Gabriel Nongrum, u la ong ruh haba ngi shim ïa kano kano ka rai ngi dei ban long kiba laitluid ha ka jingmut jingpyrkhat (Independent) bad kane ka long ruh ka nuksa ïa kiwei ki samla kiba biang ha ka dkhot met ha kaba ma ki kiba don ka jingduna ki nud ban shim ïa kane ka rai rangbah ban shongkha shongman bad kan don jingeh aiu ïa kiwei ki samla kiba baing ha ka dkhot met ba kim dei ban lehkai ïa ka kam shongkha shongman, u la ong..
Shuh shuh, u la bynrap ruh da kaba ong, ba kane ka dei ka rai kaba rangbah jongngi kum ki shijur bad ngin nym kynran dien ngin tur ïa ki jingeh ne kino kino kiba ngin sa ïa kynduh ha ka jingïaid lynti jong ka jingim bad kane ka dei ruh ka rai kaba mangi baroh ar ngut ki la shim ïa kata ka rai ba kumba u Blei u la pynïasoh, u Briew un nym lah ba pynïakhlad bad ngin ïai ïa ïeid bad ïa long kawei tad haduh ki sngi ba kut jong ka jingim, u la bynrap shuh shuh.