Watla ka pyrthei ka i ïa ki jingduna, hynrei ka kmie kam don jingsngewpher namar ka jingieit kyrpang: Renik

Mawkyrwat, Nohprah, 02: Kum ka dak jong ka jingkynmaw burom ne ïasnohkti lang ha ka sngi ba kyrpang jong ki briew kiba don ka jingduna ha ki dkhot met ne ki Persons with Disabilities (PwDs), na ka liang ka Tehsonglang Multipurpose Co-operative Society Limited, Jakrem ka la ïoh ban rakhe ïa kane ka sngi ha CLF, Laitlawsang ha kaba u bah Renikton Lyngdoh Tongkhar, u nongmihkhmat ka Mawkyrwat Constituency bad kum u Myntri jong ka sorkar Meghalaya u la long kum ka kongsan.
ïa kane ka prokram la rakhe ha ryngkat ka jingïatreilang ka ophis jong u District Social Welfare Officer, South West Khasi Hills District, ka District Legal Services Authority (DLSA), South West Khasi Hills District bad ka NPRPD Scheme, South West Khasi Hills District kaba ka phang pdeng ka long, “Ki lad ki lynti ban wanrah ha ka roi ka par da kaba pyndonkam da ki buit ne jinghikai ba thymmai bad ban pynpoi hajan baroh ki jaka khnang ban wanrah ïa ka jingïaryngkat salonsar”.
Ka jingthmu ban pynlong ïa kane ka program ka long ban tehsong lang ïa ki briew kiba don ka jinglah ba kyrpang da kaba pynlong ka jingïalang ban ai mynsiem ïa ki ba wat hapdeng ki jingduna ha ka met hynrei kim dei ban duh jingkyrmen namar ha ki ki don pat ïa ka jinglah ban leh shibun kiei kiei ki kam kiba khraw kum ha ka rwai ka siaw, ka put ka tem bad kiwei de ki kam kumba long lem kiwei pat kiba biang ha ka met ka phad.
Lyngba kane ka prokram lyngba ka NRLM ruh la khmih lynti ba ki dkhot jong ki SHGs kkin nang lah ban kyntiew ruh ïa ka ïoh ka kot lyngba ki sap kaba ki ki don ban pynmih ruh de ïa ki mar rep kiba bun jait. Shuh shuh ha kane ka sngi ym tang ban ki la ïoh ban rakhe ïa kane ka sngi jong ki briew kiba don ka jinglah ba kyrpang (PwDs) hynrei la ïoh ruh ban plie ïa ka ïew ïa die ïa thied na ki mar kiba la pynmih da ki Self Help Groups (SHGs).
U bah Renikton Lyngdoh Tongkhar, u nongmihkhmat ka Mawkyrwat Constituency bad kum u Myntri jong ka sorkar Meghalaya haba kren ha ka jingialang u la pynpaw ka jingkhublei kaba kyrpang eh na ka bynta ki kmie ki kpa kiba long ka jingkyrmen na ka bynta ki khun ha kaba ki la wan lang ha kane ka sngi ryngkat bad ki khun kiba don ka jinglah ba kyrpang (PwDs). U la ai mynsiem ia ki, ba watla ki don ia ki khun kiba don ka jingduna hynrei ki tip ba U Blei U buh ha kane ka pyrthei ryngkat ki jingthmu namar wat la ki don ha kata ka bynta ruh ki don napdeng jong ki kiba ki lah ban pyntbit ia lade ha ka rwai ka siaw, ka put ka tem bad kiwei de katkum ka jinglah lyngba ka sap kyrpang kaba U Blei U la ai.
U la ong ruh ba kane ka jingrakhe ia ka sngi ba kyrpang, kan da long shisha kaba pynkynmaw ba kim dei ban shah peit beiñ hynrei ban ñiew ia ki kumba long para briew bad ka kmie kaba kha ba pun kam lah ban ieh ia la ki jong ki khun hynrei ka kdup ieit ia ki ha manla ka sngi. “Watla ka pyrthei ka iohi ba ki don ka jingduna ha ki dkhot met, hynrei ka kmie hi kam don jingsngewpher namar ka don la ka jong ka jingieit kaba kyrpang”, ong u bah Renik. Namarkata, u la ai mynsiem ia ki khun kiba don ka jingduna ha ki dkhot met ba kim dei duh jingkyrmen ne ban rit mynsiem hynrei ki dei ban long kiba shlur bad kiba pynkmen ia la ka mynsiem khnang ba ka lawei jong ki ruh kan long kaba phyrnia kumba long kiwei de ki para briew.
Shuh shuh u la kyntu ia ki paidbah ba haba ki rakhe ia kane ka sngi ba kyrpang to kin shim ba kin da don ka jingkut jingmut ban peit ba kum ia kine ki briew kiba don ka jingduna kumba peit ka kmie kaba pun ba kha bad ba kin iohi ia kata ka jinglong kyrpang ha ki khun bad kin ieit ia ki, kin burom ia ki bad dei tang hangta ba kin iohi ba ka pyrthei baroh kan don ia kata ka jingburom kyrpang iwei ia iwei pat.
Ai ba lyngba kane ka jingrakhe kan long ka sngi ba don jingmut ha ki khun jong ngi kiba la kha kyrpang ha kane ka pyrthei namar baroh ki long kiba kordor hakhmat u briew bad hakhmat U Blei bad Un da kyrkhu ruh ia ki ha ki bynta baroh.
Ka kong J.U. Kharpuri, MCS, Additional Deputy Commissioner, South West Khasi Hills District kum ka symbud kongsan ha ka jingkren jong ka ka la ong ba ban wanrah ki jingkylla ha kiba bun ki bynta la ka long ha ka ïoh ka kot ne ha ka kamai ka kajih, ki donkam eh ïa ka jingïatreilang namar lada ki don ha ki kynhun kin lah ban pyntyllun ïa kiba bun ki kam da kaba ka la ai nuksa ruh ïa ka Jylla Kerala ba ka kiew ha ki bynta baroh ym ba ki trei marwei hynrei ki trei lyngba ki kynhun.
Kumta haba kren ha kum ka sngi, ka la ai mynsiem na ka bynta ki kmie ki kpa ba kim dei ban lehraiñ ne noh mynsiem lada ki don ïa ki khun kiba duna ha ki dkhot met hynrei ki dei ban ai ka juh ka jingieit, ka jingsumar ne ka jingshakri da kaba kin nym ai lad ba ka jingshah leh beiñ ïa ki kan wan lap namar lada kum kine ki briew kiba don ka jingduna ki shah leh beiñ ka aiñ ïa kita ki briew ruh ka don.
Kiwei pat ki nongkren ki long u bah I. Lawrynñiang, MCS, Block Development Officer (BDO) ka Mawkyrwat C&RD Block, ka kong D. Sohtun, MJS, Chief Judicial Magistrate-cum-Secretary jong ka District Legal Services Authority (DLSA), South West Khasi Hills District bad kiwei de.
Ha kane ka sngi la ïoh ban sam ki jingaisngewbha sha ki katto katne ngut kiba briew kiba don ka jingduna ha ki dkhot met.
La pynshongkun ïa kane ka sngi da ka jingrwai na ka Chilajong Village Organisation bad ka jingshad na ki hep rit ka Domjyrti.