Watla ka HNLC kam long shuh kum mynshwa, hynrei ngim dei ba kheiñ sting: Paul Lyngdoh

Shillong, Lber, 21: Na ka liang ka sorkar jylla ka la ong ba ka la pyrshang bun ki lad jingtreikam ban pynkynriah ïa kiba shong hapoh ka Harijan colony bad kan ym don ka daw ka ban ai jingdonkam ne ai burom ïa ki jingtreikam ne jingbthah ba la pynmih da ka HNLC.
“Ka sorkar ka la leh bun ki jingpyrshang bad kam pat shim la pynkut ïa kane ka jingmut ban pynkynriah ïa kiba shong hapoh ka Harijan colony. Kumta nga ïohi ba kam don ka daw ban ai burom ne ban shim kongsan than ïa ki jingbthah ne aipor ba la pynmih da ka HNLC,” ong u Myntri ka Sorkar jylla bad uba dei u nongaiktien ka sorkar MDA u Bah Paul Lyngdoh halor ka jingbyrngem ba la pynmih da ka HNLC ban pyndep pura ïa ka jingpynkynriah ïa kiba shong hapoh Harijan colony hapoh ka shibnai ne ba kin mad ïa ki jingeh.
Haba kren sha ki lad pathai khubor shaphang ka jingpynbthei bom kaba dangshen hapoh ka Them Metor bad ka jingbym shong shngaiñ ki nongshong shnong u Bah Lyngdoh u la ong, “Ka jingjia kaba kum kane kaju ïaijia ha baroh ki bynta jong ka pyrthei bad haba ïadei bad ka Meghalaya ki sngi jong ki kam pyntriem bad ki kam rah suloi ki la long ki sngi kiba la leit bad ka HNLC namar kane ka kam kam shym la long shuh ïa kaei kaba la jia ha ki 15 snem mynshwa”.
U la bynrap ruh da kaba ong, “Kam dei ka kam kaba heh kaba dei ban pynkhuslai ïa ngi hynrei ngin ym lah pat ban shah jem ne kheiñ sting bad yn pynthikna ba ka tnat pulit kan pynkhlaiñ ïa ki bor ïada khnang ba kan lah ban tehlakam ïa kine ki jinglong jingman kiba lah ban mih ha ki sngi ban wan”.
Haba ïadei bad ka jingshah ktah ki kam jngohkai, u Bah Lyngdoh uba dei ruh u Myntri ba khmih ïa ka tnat Tourism u la ong, “Kaei kaba la jia ka long tang ka jingpynkyndit ha kane ka kam kaba jia shisien lano ne kaba long marwei bad kam shym la dei kata kaba la pynlong ba kan dei kaba heh”.
“Nga la ïohi ba wat ki jaka ba khlaiñ bha ki kam jngohkai pyrthei ha kylleng ka pyrthei, kum ka ri London da kaba shu ong ka la long kaba la mad ïa ki sngi jong ki jingïakhih paidbah kiba ha ka jylla kam shym la ïohi ha ki phew snem mynshwa bad watla katta ruh ngin ym lah ban kheiñ shngaiñ ïa kum kine ki jingjia,” u la bynrap.
Na ka liang jong u, ula ong, “Hynrei ngi sngew ba ka la don ka jingkylla kaba heh kaba la jia Meghalaya ha kaba mynta ki briew ki la peit ïa ka kam jngohkai kum ka jingai kam aijam kaba heh kaba kyntiew ïa ka ïoh kamai bad kin pynleit jingmut ban pynkhlaiñ ïa kane ka bynta bad ha baroh ki shnong bad phin ïohi ba wat ki dorbar shnong ki la wan shakhmat bad ïatreilang bad ka tnat ban pynthikna ba ka jinglong shngaiñ bad ki lad jingïada kiba wanjngoh kai kan long ka kam kaba hakhmat”.