Watla don kiba pyrshah, hynrei na ka bynta ka jingmyntoi ki khynnah la pyntreikam ia ka ‘ubiAttendance’ App bad Google Map Camera ha EJHD

“Lyngba kane ka app ngin ioh ïa ka kaiphot kaba biang jong iwei pa iwei ki nonghikai skul hapoh ki cluster level, village level bad ha ka district level lada ka skul kan hiar ha ka jingpule ngin lah ban bishar bniah lyngba ka jingwan jong ki nonghikai sha ki slul ki jong ki”

0

Khliehriat jylliew 7: Watla ka la don ka jingpyrshah, hynrei kumba la dep pynbna ia ka jingpyntreikam ia ka ‘ubiAttendance’ App, na ka bynta ki nonghikai skul, kane mynta ka la treikam ha East Jaiñtia Hills District, kane ka App ka long ban bud dien ia ka jingpoi biang por ki nonghikai sha ki skul bad kumjuh ruh ka por ba ki mih na skul.Ha kaba iadei bad kane ka App, u Deputy Commissioner ka East Jaintia Hills District, u Abhilash Banarwal, IAS, u la dep pyllait paidbah myn ha ka 2 tarik mynta u bnai, ha ka jingialang ba la pynlong ha Conference Hall ha ophis u Deputy Commissioner ha kaba la ia don ryngkat lang ruh ki u Myntri ka sorkar jylla, u bah Kyrmen Shylla, ki Waheh Shnong bad ki heh sorkar.
Na ka liang u Mawphor, haba pyrshang ban budien halor kane, la lap ba kane ka la wanrah ia ka jingseisoh ha ka shnong Mualhoi, kaba don ha ka thaiñ Saipung, na ka liang u Waheh Shnong Mualhoi, u bah Dinga Ngaite u la ong ba naduh ba pyndonkam ia kane ka App, ka la pher shibun, ki nonghikai ki la wan tista sha ki skul kiba don ha ka thaiñ Saipung bad ong ba kane ka long kaba bha bad um don kano kano ka jingpyrshah halor kane ka jingpyndonkam ia kane ka ubiAttendance App, la ong ruh ba la ioh ban shim dur ia ki nonghikai naduh ha ka por mynstep ha ka por shwa ban sdang skul bad ba mih na skul, ka jingwan ki nonghikai sha ki skul ka la pher haba ianujor bad mynshwa ha ka por ba ym pat pyndonkam ia kane ka App.
Na ka liang u Waheh Shnong Ladrymbai Dongwah, u bah Deibor Suchiang, u Secretary shnong, u bah John Pala lem bad Ki dkhot shnong Ladrymbai Dongwah, u bah Kumar Lyngdoh bad u bah Hillson Amrynsong, kine ruh ki la pynpaw ia la ki jingsngew jong ki ha kaba iadei bad katei ka App Application “ Nga lap ba kane ka synjam ba la shim da u Deputy Commisisoner ka long kaba bha, ka donkam ban nang pynbha shuh shuh, lada lah ban pyndonkam ia kane ka app kan long ka jingmyntoi ia ki khun ki kti jong ngi kiba pule ha ki skul bapher bapher, khamtam kito ki skul kiba don sha ki nongkyndong nga khmih lynti ba kane ka app kan wanrah ia ka jingkylla ba ki khynnah kin ioh jingmyntoi bad ruh ba ki nonghikai ruh khamtam ha ki shnong nongkyndong kin shim khia ia la ka kam ba ki la shimti” ong u bah Deibor Suchiang, ha kajuh ka por, u la kyrpad ruh ia u Deputy Commissioner ba un shimkhia ruh ban pynbiang ia ki skul bad ki jingdonkam ki nonghikai khnang ba ki nonghikai ruh kin sngewtynnad (interest) ban hikai ban pyndep ia la ka kamram jong ki “Nga la ju iohi ha ki skul kiba don ha ki shnong kyndong kiba jngai na ka Head Quarter ba ki don bun ki skul kiba dang duna shibun ha ka jingdon ki iing skul kiba bit ba biang (Schoo; Building) kiba dang donkam ban maramot bha, don ki iing skul kiba jaw um slap ruh ha ka por slap, ha kaba ki khynnah kim long ban shong ha ki kamra skul jong ki, kumta don ki por ba hap ban pynpep ia ka jingpynlong skul, te shuwa ban iaid sha khmat ban pynurlong ia kane ka jingthmu ba bha dei ban pynbiang lut iaki jingdonkam ki nonghikai, ba ka tulop dei ban ai ha ka por ba biang ba kan nym ktah ia ki nonghikai, nga sngewthuh ba ki nonghikai ki dei ki kmie ba ar, kumta nga kyrpad ia ki bor district ban sngewbha ban iarap lem bad nga kyrpad ruh ia ki nonghikai ba kin nyn sngewthuh bakla ia kane ka app, kane kam mut ia kito ki nonghikai kiba wan tista bad kiba trei hok ia ka kam, hynrei dei na ka bynta jong ki katto katne ki nonghikai ki bym ju pyndep hok ia ka kamram jong ki te ngeit ba lyngba kane ka app kin sa trei hok ia la ka kam”
Na ka liang u Secretary Shnong Ladrymbai Dongwah, u bah John Pala, u la pynpaw ka jingsngew nguh ia u Deputy Commissioner halor kane ka jingpyntreikam ia kane ka ubiAttendance App hapoh ka district, hynrei ha kajuh ka por u la buh ka jingkylli ba yn leh kumno pat lada ki nonghikai ki pang ki shitom, te halor kane u la kyrpad ia u Deputy Commissioner ba un sngewbha ban wad ki lad ki lynti ba kan nym wanrah jingeh than ia ki nonghikai kiba ngat ha ka pang ka shitom.
U bah Pala, u la pynshai ruh ba kane ka App lah ruh ban leh da ka Offline kam da donkam eh ban leh Online. Kawei ruh kaba u bah John Pala, u la kyrpad ka long ba ha East Jaiñtia Hills donkam ruh ban don ki iing skul kiba biang ha shwa ban pyndonkam ia kane ka app hapoh ka district.
U Head Master jong ka Khliehriat Presbyterian Upper Primary School, u bah Moonlight Bareh, u la ong “ Haba pyntreikam ia kane ka app, mynta ka jingkylli ka mih, ba balei tang ha East Jaiñtia Hills District pyndonkam ia kane ka app? ha Meghalaya don 12 tylli ki distrit, te la dei ban pyndonkam lang ha baroh ki district, hooid kane ka app kam dei kaba sniew, ka dei kaba bha, ka ban kyntiew ia ka pule, dangle hapoh ka district, hynrei kaei kaba nga sngew shon ka dei ba ha EJHD ban pyndonkam ia kane ka app ka long kaba eh, namar don ki jaka ba kim ioh tang ka mobile network ruh, kum ha ka thaiñ Saipung, ki shnong ha ki thaiñ khappud, kum ka Huroi, Hingaria ki bym ioh net work, haba kumta ki nonghkai ki bym lah ban phah ia ki attendance jong ki, yn leh kumno ia ki?, nga sngew ba na ka liang ka sorkar ka dei ban da bishar bniah shwa ia kane, lada ka sorkar ka don kum kane ka jingthmu ka la dei ban pynbiang shwa ia ka network kaba paka”
Kumjuh ruh na ka liang ki nonghikai jong ka Little Flower, ka kong Dayamonlang Rymbai, ka kong Enavchal Dopri bad ka kong Toda Sukhlain, ki la pynpaw ka jingsngew klumar jingmut ha kaba iadei bad kane ka jingpyntreikam ia kane ka ubiAttendance App bad ka Google Map Camera, namar ba ia kane ka shu pyntreikam khlem ka jingai jinghikai kaba biang, ha kajuh ka por ki la ong ruh ba kim sngew iahap satia ia kane ka jingpyntreikam ia kane ka app namar haba pyntreikam ka dei ban long solonsar ia baroh ki skul hapoh ka jylla baroh kawei, ki la pynpaw ruh ka jingsngew lyngngoh ba balei ia kane ka app la pyntreikam tang ha East Jaiñtia Hills District.
Kum ban shu phai dien biang, ha ka jingialang ba la pynlong myn ha ka 2 tarik mynta u bnai, na ka liang u Bah Kyrmen Shylla, u la kyntu ïa ki nonghikai ba kin ai ka jingiatreilang ryngkat bad ki bor pyniaid district lyngba kane ka ‘Teachers Attendance Monitoring app.’ khnang ban pynioh ïa ka hok jong ki khynnah hapoh ka district, ki nonghikai ki dei ban pyni ïa ka jinglong beit bad jinglong ryntih, ne discipline bad ruh ban hikai ïa ki khynnah ba kin long kiba long ryntih (discipline) “Nga ngeit ba kane ka app kan pynioh jingmyntoi shibun ïa ki khynnah skul khnang ba kin ym duh nong lyngba ka jingbym don ki nonghikai ki bym shim la ioh jingbit ban pep,” ong shuh shuh u Myntri.
Kham ha shwa, ha kane ka prokram u S.D.O Sadar, East Jaintia Hills District, u A. K Singh, IAS u la pyni ha kaba iadei bad ka rukom pyntreikam ïa kane ka app lyngba ka video conferencing, u la pyntip ha ka jingialang ba ka ‘Teacher Attendance Monitoring app’ ba la pynbit pynbiang da ka UBI tech solutionkan bad kan bishar bniah halor ki jingtreikam jong ki nonghikai jong ki skul sorkar bapher bapher hapoh ka district.
Nalor kata u la kdew ruh halor ki rukom treikam jong kane ka app kaba don ïa kor ki bor kiba pynithuh ïa ki durkhmat kaba lah ban pynthikna haduh 70 percent ban ithuh ïa ki briew bad ka ban rejistar ïa ka ne u nonghikai wat lada ym don ka internet connection, bad kane ka plie lad ruh ha kaba ïadei bad ka jingwan skul ne attendance wat na ka bynta kito kiba trei shabar ne field workers lyngba ka jingpyndait ïa ki GPS ha ki jaka treikam kiba don marjan.
“Lyngba kane ka app ngin ioh ïa ka kaiphot kaba biang jong iwei pa iwei ki nonghikai skul hapoh ki cluster level, village level bad ha ka district level lada ka skul kan hiar ha ka jingpule ngin lah ban bishar bniah lyngba ka jingwan jong ki nonghikai sha ki slul ki jong ki,” ong u S.D.O Sadar, East Jaiñtia Hills District.

Leave A Reply

Your email address will not be published.