Wat pynmlien ban ïeng kali ha ki por mynmiet ha ki jaka bym dei ban ïeng, maham ki Longkmie Mawkyrwat

Mawkyrwat, Risaw 3: Ki Seng Kynthei Longkmie jong ka Dong ba haneng jong ka Shnong Mawkyrwat, South West Khasi Hills District ha ka step jong ka 1 tarik u Risaw, 2022 ki la pynlong ïa ka jingpynkhuid ïa ki shilynter jong ka surok bah naduh lad Thanad haduh Phot Umnew bad ha kane ka jingpynkhuid ïa la lap ïa shibun ki kynja plastik bad ki kynja bilor kyiad ha ki katto katne ki jaka ïa kaba ki briew ki ju mlien ban ïeng kali ha ki por mynmiet.
Namarkata, lyngba kine ki jingmih ki eiei ki jakhlia ha ki lynti ki surok kum ka Seng Longkmie Mawkyrwat ka buh ka jingmaham ïa ki paidbah kiba ju mlien ban ïeng kali ne shongkai ha ki por mynmiet mynïong ha ki rud surok ne wat ha ki surok shnong ba nangne shakhmat kim dei shuh ba kin dang wan ïeng kali ha ki por miet namar ba ym lah tip ba ki dei ki briew kiba bha ne kiba sniew.
Kumta ka la kyrpad ba khnang ba kan long ka jingshngaiñ ïa ki paidbah nongleit nongwan la kyntu ba kim dei shuh ban dang ïeng kai miet harud surok khamtam eh hajan jong ka Phot Umnew. Ym tang kata, la sakhi ruh ba haba ki briew ki ïeng kai ïa ki kali ki don ruh kiba bret pathar ïa plastik bad ki kynja bilor ha kaba kane ka la wanrah ka jingjakhlai bad kumjuh ruh da kaba bret pathar khamtam ïa ki bilor ka lah ban wanrah ruh ka jingmynsaw bad pynjakhlia ïa ka mariang namar na kane ka wah ka Phot Umnew kum ka shnong Mawkyrwat bad kiwei de ki shnong ba marjan ki pyndonkam ban dih, ong ka kong Shimtimon Blah.
Ka la ong ruh ba kum ki longkmie kiba ju peit ïa ka bha ka miat ïa ka lawei ki khun ki kti nangne ka buh ka jingkyntu ïa ki paidbah ba kin tip la ki dei ki para-shnong para-thaw ne ki ba dei nabar jong ka shnong ba nangne shakhmat kan sa wan ka por ba ha kano kano ka sngi ba kin sa pyntip ïa ki number kali kiba pynkheiñ bad ju mlien ban ïeng miet ha ki rud surok kiba hap hapoh ka shnong Mawkyrwat kin sa shim ïa ka bynta katkum ka jingwat ban hap ban bishar ïa ki khnang ba kan long ka jingshngaiñ khamtam ïa ki khun kynthei ha kane ka dong ka thaiñ.