Shillong, Naitung 23 : Ka Hynniewtrep Youth Council (HYC) ka la dawa na ka sorkar jylla ba kam dei satia ba kan kyrkieh ban pdiang bad pyntreikam ïa ka National Education Policy (NEP) 2020 kaba thymmai ha ka jylla.
Ka Council ka la ong ruh ba ki la thoh ruh sha ka tnad pule puthi ka sorkar jylla pyrshah ïa ka jingthmu jong u Vice Chancellor jong ka skulbah NEHU ban ïaid shakhmat ban pyntreikam ïa ka NEP, 2020 ha ki jaka pule kiba don ha ka jylla naduh kane ka samoi 2023.
“Ka Council ka pynpaw ba kum kitei ki rai ba shim da u Vice Chancellor jong ka skulbah NEHU ban pyntreikam ïa ka NEP 2020 ha ki college ba pynïasoh bad ka NEHU ha kajylla khlem da syllok lang lane pan jingmut lang na ki jaka pule kan long pyrshah pynban ïa ka thong bad ka jingthmu jong ka NEP 2020,” ong u Education Secretary ka HYC, Bah Enlang Sawian haba kren ha kane ka Sngi U Blei.
Shuh shuh u ong ruh ba ka Council kam dei ba ka pyrshah ïa ka jingpyntreikam ïa ka NEP 2020 namar ki ïohi ba ka thong jong ka, ka long na ka bynta ban pynkylla ïa ka pule puthi.
“Hynrei, naba bun ki jaka pule ha ka jylla kim pat da biang ïa ki jaka pule bad ruh kiwei ki jingdonkam ba bun, nangta ka jingbym pat syllok lang ïa baroh la ka long naduh ki paidbah, ka sorkar jylla, ki kmie ki kpa, ki nonghikai, ki samla pule kumta yn ym lah ban kot sha ka thong jong katei ka Policy,” u la ong.
Kumta, na ka liang ka Council ka dawa ba ka tnad pule puthi jong ka sorkar jylla ba kadei ban bishar bniah biang bad kam dei satia ban leh kyrkieh ban pdiang bad pyntreikam ïa katei ka NEP ba thymmai ha ka jylla,” u la bynrap biang.
