Nongpoh, Jymmang 23: Ka kynhun The Ultimate Legend Biker’s Association, Eastern Zone kaba la jutip kum ka TULBA kaba dei kawei na ka kynhun ñiah thuk thuk kaba ju leh ïa kiba bun ki kam ba bha sha ka imlang ka sahlang, mynta ka sngi ka la bteng ban pynlong ïa ki prokram ai jinghikai ban pynphriang ïa ka khubor halor ka jingma u drok, ban ai jingshai shaphang ka aiñ POCSO kaba dei ka aiñ kaba ai jingïada ïa ki khyllung khynnah na ka jingshah thombor.
Ïa katei ka prokram la pynlong ha Umroi Presbyterian Higher Secondary School ha kaba u Bah Kyrmenlang Uriah, u nongthoh khubor ka jylla u la shim bynta kum u kongsan haka jingdonlang ka Dr. Saphronia Mawñiuh kaba dei ka nonghikai bad kumjuh ruh ka nongsaid aiñ, Bah KC Lywait OC ka Umïam Police Station, Bah T.P Tmung, Principal ka Umroi Presbyterian Higher Secondary School, Bah Samuel Kurbah President ka TULBA Eastern Zone lem bad ki dkhot, ki nongtrei ka CHC Bhoirymbong, ki nongïalam shnong, bad kiwei kiwei ki riew rangbah lem bad ki khynnah skul bapher bapher ka thaiñ Umroi.
Katei ka prokram ban pynphriang ïa ka khubor halor ka jingma u drok ka la long ruh ka jingmyntoi ïa kiba bun ki nongsngap ha katei ka sngi khamtam ki khynnah skul kiba dang hapoh 18 snem ka rta ba ki dei ban tip shaphang ka aiñ POCSO, kumno ka rukom treikam jong ka bad ka jingpynshitom kaba ap ïa kiba pynkheiñ wat haka kam shongkha shongman ba la mynjur da ki kmie ki kpa, namar katei ka aiñ ka bud nadien nadien ban ioh pynshitom ïa kiba donkti pyrshah bad kiba thombor ïa ki khyllung khynnah.
Ki nongkren ha katei ka sngi naduh u kongsan bad kiwei kiwei ki la ban jur halor ka jingjyllei u drok ha kane ka juk ba mynta ba ka imlang ka sahlang ka la dap satang ka jingma ka jingsyier khamtam ki khyllung bad ki kynthei khynnah bad kane ka jingjylle u drok ka la long kum ka jingpang kaba la sar wat sha ki hep barit, ki bym pat tip ïa ka dang ka duh, hynrei ka dei tang ka jingshah ïalam bakla bad shah pynbiej ha kiba la ngop ha utei u jait jingdih bad kyntu ruh ïa ki samla pule ha katei ka sngi ba kim dei ban ktah ne ban mad da lei lei ruh ïa utei u jait jingdih bad ban kiar lai lum lai wah namar shisien ba ki khynnah ki la ngop ka la eh ïa ki ban bthat bad ka jingsohsat ka la ap lypa ïa ka jingim jong ki, ka iing ka sem bad ka imlang ka sahlang.
