Nongpoh, Jymmang 23: Ka Prime Meghalaya, kaba la pynmih da ka sorkar Meghalaya ha u snem 2019 ban kyrshan bad kyntiew ïa ki nongsengkam lajong mynta ka sngi ka la nang pyniar bad pynjan sha ki paidbah ïa ka jaka treikam jong ki ban plie sa kawei pat ka ophis treikam ha Nongpoh Downgate kaba la tip kum ka Prime Startup Hub Nongpoh.
Ïa ka tnad treikam jong ka Prime Meghalaya la wan ban plie paidbah da u Bah Jonathan Shylla Additional Deputy Commissioner ka Ri Bhoi District kum u kongsan haka jingdonlang u Bah Keningstar Nongrum, Administrative Head ka PRIME Hub, u Pranjal Konwar, Chief Operating Officer ka IIMCIP, u Bah Sylvester Mynsong Rangbah Shnong ka Nongpoh, ka Merisha Toi Centre Manager ka Prime Hub Nongpoh, ki nongseng kam sengjam lajong bad kiwei kiwei ki riew rangbah.
U Bah Jonathan Shylla haba kren ha katei ka sngi kum u kongsan u la ai ka jingkhublei ba kyrpang iaka Prime Meghalaya kaba la shim ïa ka sienjam ban plie ïa ka tnad treikam ha Nongpoh bad kane ka dei ka kabu ksiar ïa ki samla ka district ban long kum ka lad ban kyntiew ïa ka sap bad pyniar ïa ka kam ka jam jong ki namar watla bun ki samla ki la pyndep ïa ki jingpule bapher bapher hynrei ka long pat kaba eh ïa ka sorkar ban pynbiang kam lut da ki kam sorkar sha baroh ki samla kiba la dep pule.
Haba ki samla ki don ka sap, ka jingiohi ïa ka lawei lyngba ka sap kaba ki don ki dei ban shim ïa ka kabu bad ka Prime Meghalaya ka long kum ka nongbtin lynti ban pynurlong ïa ka jingthmu bad ka jingangnud jong ki.
