Wat ka Sorkar ruh kam pat shai ha kano ka nongrim ka ïeng halor ka Roster System: George B Lyngdoh

Shillong, Ïaïong 22: U Vice President ka All India Trinamool Congress (AITC) Meghalaya uba long ruh u MLA barim ka Umroi, u Bah George B Lyngdoh u la ong
ka sorkar jylla kat haduh kane ka kynti kaba mynta kam pat pynshai satia ha kano ka nongrim ka ïeng ha kaba ïa dei bad ka jingpyntreikam ïa ka Roster System la kan dei naduh u 1972 ne da kumwei pat.
Haba kren bad u Mawphor u Bah George u la ong ba kumba long mynta ka sorkar kam pat pynshai ïa ka nongrim kaba ka shim namar i kumba ka pyrshang pynban ban thet kti ïa kane ka kam.
“Ngam pat ïohi ba ka sorkar kan pynshai ïa kane ka mat namar ha Ïingdorbar ka ong ïa u paidbha ba lada kwah pynkylla ïa ka jingpyntreikam ïa ka Roster ba kin leit beit sha Court bad ha ki lad pathai khubor pat ki pynpaw ba ki kwah ban pyntreikam ïa kane system naduh u 2022 sha khmat,” u la ong.
Shuh shuh u la ong ba ka jingbym shim jingkit khlieh ka sorkar ha kaba ïadei bad kane ka mat ka wanrah pynban ïa ka jingdukha mynsiem ïa kiba bun bah ki samla ha ka jylla.
“Ka sorkar ka phah leit sha kashari katba ka kashari pat ka phah leit sha ka sorkar bad na kata ka daw ka sorkar ka dei ban shim jingkit khlieh ïa kane ka mat ym ban ieh kumto namar kan wanrah jingktah pat ïa ki samla,” u la ong.
Haba kylli halor ka jingdawa ban pynkylla ïa Reservation Policy bad ka Roster System, “Ka daw tynrai jong ka jingkwah ban pynkylla ka dei beit namar ka jingjyllei ka jingbym ïohkam ki samla. Phin peit nuksa ïa ka jingkhot aplai kam ka sorkar ha ka tnat pulit tang na bynta kumba 1300 tam tylli ki post hynrei ki aplication kiba ïoh pdiang pat ki poi da ki lak bad kane ka la pyni shai ïa ka jingjyllei ka jingkyrduh kam ki samla ha ka jylla,” ong u Bah George haba kren bad u Mawphor.
“Ka jingnang kiew ki samla kiba wad kam bad kiba kwah ïohkam ha ka tnat sorkar ka pynlong ïa kiba bun ban pyrkhat ba ka jingdon kane ka polisi bhah kam ka khang lad pynban ïa ki ban ïohkam,” u la bynrap.
U la ong ba jin lada kam don ka jingkyrduh kam kumba ka long mynta kane ka jingkhih phaloh kan ym jia kumne.
“Ka sorkar ha jaka ban wad ki lad ki lynti ban ïarap ïa ki samla ban ïeng ha la ki kjat bad ban hikai ruh hynrei kam don kano kano ka jingpyrshang kaba kum kata bad kiba bun hi ki peit sha ka kam sorkar kum ka lad ba khatduh eh kaba ki don jingkyrmen, hynrei kumba nga la ong ba ka jingnang bun kiba aplai ka pynlong ba kan long kumne,” u la ong.
“Ka Reservation bad ka Roster kam dei ban wanrah ïa ka jingsngew kutlad ha ki khun samla bad ka jingsngew dukha mynsiem ruh ha ki hynrei ka dei ban wanrah ïa ka mynsiem sngew shngaiñ na ka jingdon ka Reservation Policy, na kata ka daw ka sorkar ka dei ban long kaba stad ïa kane khnang ba ki samla kin ym sngew shah ieh beiñ,” u la ong.