Shillong, Naitung 25: Ka Meghalaya Sport Climbing & Mountaineering Association ka la thoh sha u Deputy Commissioner jong ka West Jiantia Hills ban pyntip ba uwei u briew uba la shah pynduh jingithuh da ka MeSCMA bad shah khang na baroh ki Mountaineering Foundation jong ka ri India, ba u la pynïaid ïa ki kam lyngba ka West Jaiñtia Hills District Adventure Sports & Mountaineering Club bad ïohpdiang ruh ïa ka jingkyrshan pisa na ka Sorkar Jylla, kiba na ka liang jong ka MeSCMA ka la pyntip, ba um dei hok satia ban ïoh.
Ha ka taïew ba la dep ka kyrwoh khubor na ka WJHDASMC ka la pyntip ba ka la pynlong ïa ka prokram ai jinghikai kaba khlem jingsiew na ka bynta ki 20 ngut bad nangta ka la bteng ïa ka prokram hikai kaba kham kongsan ha ka 11 tarik u Naitung.
Ha kaba ïadei bad kane, ha ka 24 tarik Naitung na ka liang jong ka MeSCMA ka la ïathuh ha u DC ba ïa ka WJHDASMC la ïalam da uwei ubriew uba la tip kyrteng da u Sambor Surong, “uba kam ba u dei u nongseng bad u nonghikai ba hakhmat eh jong ka”. Hynrei u Sambor Surong u la shah “pynduh jingithuh” da ka MeSCMA ha u snem 2015 namar ka “jingbym long ryntih” kaba la pynlong ïa ka seng ban pynduh ïa ka jingithuh.
Nangta ha u snem 2021, ka IMF ka la pynmih ïa ka jingpynbna ba u Sambor Surong u la pyndonkam da ka sertiphiket ban ïoh ïa ki “jingmyntoi bym dei” na ka sorkar Jylla Meghalaya. Ha ka jingshisha ka sertiphiket, kaba u Sambor Surong u la pyndonkam ka dei kaba u la ïohpdiang namar ba u la ïashim bynta ha ki ar tylli ki jingïakop kiew lum jong ka ri, na ka IMF, ka dei kaba shisha. Hynrei hadien ba la ai jingpyntip ba u Surong um shym la ïashim bynta shisha ha kita ki jingïakop bad ka IMF ka la weng noh ïa katei ka sertiphiket.
“Ia utei u riew shimet (Sambor Surong) la khang ruh ban ïashim bynta ha kano kano ka jingïakop kiew lum jong ka IMF ha ki por ban wan,” la pyntip ha ka kyrwoh jong ka synjuk ba ha khlieh duh na ka bynta ka Mountaineering ha ka ri.
Ka MeSCMA ka la pynshai sha u DC ba ka ngeit ba ki kyndon jong ka YESS Meghalaya – ka prokram jong ka sorkar ban kyrshan ïa ki synjuk kiba pynshong nongrim ha ki samla – ki dei ban khanglad ïa ka jingai pisa jong ka jylla ïa ka WJHDASMC namar ka jingkynrum kynram jong u Surong bad ka MeSCMA bad ka IMF.
“Ka long kaba sngewkhia shibun ba watla la pynduh jingithuh bad pynduh kam ïa u, u Surong u dang ïai bteng ban pyni ïa lade kum ka bor ba dei hok ha kane ka liang. Ka jingïadon bynta jong u kaba dang ïai bteng ha kum kine ki kam ka buh jingma ban ïalam bakla ïa ki samla jong ka jylla, kiba bun na ki ki angnud ban tei ïa ki kam kiba lah ban shaniah bad kiba tbit ha ka kam shang pyrthei bad ka jingkiew lum,” la ong ka MeSCMA.
