Nongstoiñ, Jymmang 22: Ka Seng khasi ka dei kawei na ki niam tynrai jong u khun Khasi khara kaba dang bat ïa ki riti dustur jong u mynnor, kaba long ruh kum kawei ka dur kaba pynithuh sha ka pyrthei hi baroh kawei, ïa ka jinglong tynrai bad ka jinglong kyrpang jong ka jaidbynriew Hynñiewtrep. Hynrei phewse kane ka niam wat haba ka dei kawei na ki niam tynrai, hynrei ka shah iuhroit wat ha ri lajong, namar ba don ki katto katne kiba la sngewthuh bakla bad kiba la leh shilliang bad kiba la niew beiñ ïa ki ha kane ka jylla.
Kawei na kine ki jingjia kaba la jia ka long ïa ka ïa ka Seng Khasi Nongstoiñ, ha kaba la ong ba katei ka Seng Khasi Nongstoiñ ka la thied ïa kawei ka jaka ha ka shnong Sylleiïawkheiñ kawei na ki shnong kaba don ha ki khap sor Nongstoiñ. Ka jingthmu jong katei ka jaka ka long kum shi bynta ban pynlong, ne ban pyndonkam kum ka jaka thang met ïap na ka bynta ki khun ki hajar jong ka niam, kaba ki ju khot ruh ïa ka kum ka Kpep. Pynban la ong ba katei ka shnong kam shym la shah ïa katei ka seng ba kan thang met ïap ha katei ka shnong, wat haba ka seng ka la biang ïa ki kot ki sla kaba ki la ïoh ruh ïa ka NOC na katei ka shnong lyngba u bah Maksimus Nongphud Sordar barim ka shnong Sylleiïawkheiñ.
La ong shuh shuh ba ka seng ka la batai bniah ïa ka shnong, ba ha katei ka jaka yn thaw ne tei ïa ka jaka thang met ïap, kaba katkum kane ka juk kaba mynta, ka ban ym don ka jingktah ïa ka imlang sahlang, kaba long katkum ka juk stad saïan kaba thymmai ba mynta, hynrei ka shnong ka la pyneh beit triang.
Haba ïakynduh markhmat bad u bah Hemborlin Kharsyntiew u ba dei u sordar ba shipor jong ka shnong Sylleiïawkheiñ, u la ong ba katkum ka jingtip jong u, dei u sordar barim u ba la ai ïa ka NOC, hynrei ka shnong ka la shim ïa ka rai ba ïa mynta ka shnong kan ai lad ïa ka Seng Khasi ba kan shu tep ym ban thang, kata tad haduh ba yn da ïa pynbeit biang da kumwei. Na ka liang u Bah R.Ryntathiang President Seng Khasi West Khasi Hills District, u la ong ba ka seng ka la thied ïa katei ka jaka bad la dep register ruh hakhmat ka ophis jong u Syiem. “Na ka liang jong ngi, ngi la don ka jingmut ban shna ïa ka jingthang briew kaba long katkum ka juk ba mynta, hynrei na ka liang ka shnong kam shah. Na ka liang jong ngi ka Seng ngi la dep ban buh jingthoh hakhmat jong u Syiem halor kane bad na ka liang u sordar barim u la ai ka jingmynjur”, u la ong.
“Mynta pat ngi ïoh ïa ka jingthoh na u sordar ba thymmai ba ka shnong kam shah ban shna ïa katei ka jaka thang briew. Na ka liang jong ka seng ka pynpaw ka jingsngewsih ïa kane ka rai jong ka shnong bad ngi ruh ngin hap ban ïaid hi da ki lynti katba shong ka aiñ. Lehse ka lah ban don ka jingsngewthuh bakla na ka liang jong ka shnong halor kane ka jingthmu jong ngi”.
“Na ka liang jong ngi watla ngi la dei kita kiba rit paid hapoh ka Bri u Hynñiewtrep ruh, hynrei ngi shim beit ba kane ka rai jong ka shnong ka dei tang ka jingsngewthuh bakla jong ki. Na ka liang jong ngi, ngin pyrshang ban pynsngewthuh bad pynshai ryngkat ka plan ba ngi don ban thaw ïa ka jaka thang briew”, u la ong.
