Shillong, Naiwieng, 17: U Bah Banshai Marbaniang, uba long u nongtrei monsngewbha u lah ban wanrah ïa ka kynhun jong ki doktor na ka Vision Spring Foundation (VSF), New Delhi kaba don ryngkatlang bad ka World Vision International ha ka ri United Kingdom ban ïarap ïa ki khynnah skul ha ka shnong Mawsynram ban ïoh jingsumar khmat ei.
Ka jingai jingsumar khmat naduh ki heprit ba dang don ha ka rta kaba 7 snem haduh 18 snem ka long na ka bynta ki khynnah kiba pule ha ki skul bapher bapher kiba don hapoh ka shnong Mawsynram kynthup naduh ka Rev. JJM Nichol’s Roy L.P & U.P. School, ka Seng Khasi L.P. & U.P. School, ka St. Francis Xavier School, ka Mawsynram Higher Secondary School, ka Jawahar Navodaya Vidyalaya (JNV) ba don ha ka shnong Mawsynram bad kawei kaba don ha ka shnong Mawphlang.
Lasdang ïa kane ka jingai jingsumar ei ïa ki khmat naduh ka 13 tarik mynta u bnai bad la lah ban pyndep haduh ka sngi Saitjaiñ bad ki don kumba 1011 ngut ki khynnah skul kiba la ïoh ïa ka jingsumar.
Katba ki sngi ki nang tyllun halor kane ka jingai jingsumar ïa ki khmat la shem ïa ki khynnah skul kiba don ki jingpang khmat kum kane ka por ka dei lyngba ka Mobile Phone bad kiwei kiwei kiba dang lah ban dang ktah.
Ki don ki khynnah skul kiba ladei ban phah sumar ïa ki khmat bad ki don pat kiba la ïoh ïa ki iitkhmat.
Ka jingaiiti ïa ki ïitkhmat ka long ruh katkum ka por ha kaba ïadei bad ki Fashionable Eye Glasses ha kaba ym shym la ai thurmur khlem da don ka bynta ha kaba ïadei bad ka jingim briew katkum ka por.
Ki nongsumar khmat kiba la pyndep ïa kane jingai jingsumar ki long u Suraj Kumar Mehata, Gayatri Gogoi, Priyanka Das, Sadhana Kumari, Santana Borah bad u Clement Songate kiba la wan na Delhi, Rajasthan bad Assam.
U Bah Banshai u la ai khublei ïa ki Principal, Headmaster bad Headmistress jong ki skul kiba la pdiang ban shim ïa kane ka bynta khlem da pynslem watla ki khynnah ki la hap ban pynkhreh ïa ka jingsdang jong ka eksamin kut snem.
