Shillong, Rymphang 21 : Ka jingpep khah khah jong ki MLA ka Liang Pyrshah ha kane ka Dorbar Mang Tyngka ka ïing Dorbar Thaw Aiñ ka la wanrah ka jingsngew artatien namar kum ki Nongmihkhmat Paidbah ka kamram jongki ka long ban pynsngew ïa ka sur jong u paidbah hapoh ka ïing Dorbar Thaw Aiñ.
Ha ka sngi ba saw jong ka Dorbar Mang tyngka, u Lamphang ka ïing Dorbar Thaw Aiñ u Thomas A Sangma, ula kheiñ iap noh ïa ka jingkylli ba la buh ha ki (starred Question) jong u Myntri Rangbah barim bad MLA ka Songsak Dr Mukul Sangma namar ka jingpep jong u ban wan sha ka Dorbar.
U Dr Mukul u dei ban buh ïa ka jingkylli hakhmat u Myntri Rangbah ka Jylla Conrad K Sangma haba ïadei bad ka jingthungkam jong ka Sorkar ïa ki Chairman/Co Chairman/Vice Chairman bad ter ter (political appointment) haduh kine ki sngi ba mynta.
Ha ka sngi kaba lai, u Lamphang ula kheiñ iap ruh ïa ka jingkylli ba la wanrah da u MLA ka Voice of the People Party (VPP) ka North Shillong Bah Adelbert Nongrum namar ka jingjah noh na ka Dorbar. U Bah Adelbert u khlem pep satia ha shilynter jong ka Dorbar hynrei ula mih noh napoh ka ïing Dorkar hashuwa ban poi ka pali ba un wanrah ïa ka jingkylli kaba ula buh.
Ka jingkylli kaba u dei ban wanrah kum u MLA ka VPP ka ïadei bad ka jingkynnoh thombor ki Pulit ïa u MLA ka VPP na Mawlai Bah Brightstarwell Marbaniang ha ka jingïakhih ba dang shen jong ka VPP, kaba pyrshah ïa ka jingwengkam ïa ki Ophisar ka Meghalaya Lokayukta.
Kaba thamula, ki MLA ka VPP kila ju buh jingkylli bha halor ka jingbuh duna palat ïa ka por pynlong ïa ka Dorbar, kaba la pynbor ïa ki ban hap mih sha surok ban pynsngew ïa ki ishu ba ki don hakhmat u paidbah.
Dang shen, ha ka jingïalang ha Mawlai, u MLA ka VPP Bah Adelbert Nongrum ula pynpaw paidbah ïa ka jingkwah jong u ban wanrah hapoh ka ïing Dorbar ïa ka jingjia kaba la jia ha u MLA ka Mawlai (ba kynnoh thombor ki Pulit). Hynrei, haba ka pali jong ka jingkylli kala wan ban ïatai, une u MLA ula jied ban jah napoh ka ïing Dorbar.
Kiba bun ki la pynpaw ïa ka jingsngewkhia halor ka jingïapait ïapra jong ka Liang Pyrshah. Ha ka por ba u Bah Adelbert u wanrah ïa ka Bill shimet ban pynkylla ïa ka Meghalaya Lokayukta Act, jan shiteng na ki dkhot ka Liang Pyrshah bad arngut ki MLA ba rangbah ka VPP kynthup u President Bah Ardent M Basaiawmoit bad MLA ka Mawryngkneng Bah Heaving Stone Kharpran, ki la jah napoh ka ïing Dorbar.
U Nongialam ka Liang Pyrshah Bah Ronnie V Lyngdoh, hashuwa ban sdang ka Dorbar Mang tyngka, ula thoh shithi sha baroh ki Party kiba don ha ka Liang Pyrshah ba kin ïatreilang ha ka Dorbar Mang Tyngka. Hynrei, ka VPP kala jied ban trei la ka jong bad kan ïatreilang bad kiwei ki dkhot ka Liang Pyrshah tang ha ki katto katne ki ishu.
