Wanrah nam ka Elad Shylla na ka rynsan ïakhun jong ka 7th National Level Open Invitational 2025

Khliehriat, ïaiong 02: Ka samla lud kaba dang 16 snem kyrta, ka Elad Shylla kaba na ka shnong Khliehriat East, East Jaiñtia Hills District ka la lah ioh rah ïa ka nam lah duh ha ka jingiakhun karate/martial arts ha ka lympung jong ka 7th National Level open invitational, Tulunadu Karate Championship 2025 ba la pynlong ha Udyavara Grama Panchayath Stadium, Karnataka bad nalor kane ka la rah ruh bun tylli ki trophy bad ki medal ha ki lympung iakhun bapher bapher.
Ka Elad Shylla ka dei ka khun jong i kong Treiuty Shylla bad u kpa u bah Foresting Lyngdoh, ka la sdang ban ialehkai karate naduh ka por ba dang don 11 snem kyrta ha kaba ka la ioh ka jinghikai ba paka na ka skul ba ka pule, ka Bhagawan Shri Sathya Sai Vidya Kendra (E.M) Chokkady, Karnataka bad ka la ioh ruh ka lad ban pynpaw pyrthei ïa ka sap ha ki rynsan bapher bapher ha ka jingiakhun karate/Martial Arts bad ka la ioh rah bun tylli ki trophy bad ki medal ruh ha ki Acadamic Sports and Games ba la pynlong ha skul ba ka pule ha karnataka.
Mynta katei ka samla Elad Shylla ka dang pule ha ka Govt. College For Girls, Balmatta, Mangaluru bad ha ka rynsan iakhun martial Arts bad la pynlong da kane ka college ruh, myn ha ka 22 tarik u naiwieng 2024, ka Elad Shylla ka la rah ïa ka nam lahduh bad ioh khur ïa ka trophy bad ka medal.
Ha kaba iakren bad u Mawphor, ka samla Elad Shylla ka la ong bad iathuh ba ha ka por ba ka dang shong class VI ka la sdang ban ialehkai karate bad ynda ka la poi class XI u nonghikai jong ka u la ailad ïa ka ban leit ïa shimbynta ha ki rynsan iakhun karate bad kumta ka la poi shaduh ka State Level ha ka jylla Karnataka bad mynta pat ka la lah ban poi shaduh ka National Level, ka 7th National Level Invitational Tuluna Karate Championship ha kaba la rah ïa ka nam lahduh bad dei hangne la kyntiew kyrdan ruh ïa ka sha kawei pat ka kyrdan lane ka Belt ha ka jingialehkai karate.
Ka la ong ruh ba ka dei lyngba ka jingkyrshan u nonghikai, u Dr P. Anantha Krisha Bhatt bad u coach jong ka, u Santosh Kumar ba ka la lah ban poi shaduh ka kyrdan National Level, kumta na ka liang jong kane ka samla ka ai ka jingkhublei ïa baroh ki nonghikai kiba ju kyrshan ïa ka bad ïa u coach, uba ai jinghikai ïa ka bad ka ai khublei ruh ïa ka kmie, u kpa, kiba haïing ha sem kiba ju pynshlur bad ai mynsiem ïa ka man ka por bad ka la pynpaw ruh ba ka don ka jingangnud ba kan poi shuh shuh sa sha ki kyrdan kiba kham shalor kiba shaduh ka International Level lyngba ka jingiarap lang na ka sorkar jong ka jylla Meghalaya ruh lyngba ka tnat Sport.
U kpa jong ka samla Elad Shylla, u bah Foresting Lyngdoh u la ong “kane ka khun jong nga kaba pule ha ka skul Bhagawan Shri Sathya Sai Vidya Kendra ka la ioh shisha ka jinghikai kaba paka na ka skul namar kane ka skul kam shym la ai ïa ki khynnah tang ka jingnang jingstad ha ka pule puthi hynrei ka ai ruh ïa ki khynnah ïa ki jinghikai kilan met na ka bynta ka koit ka khiah bad ka la ioh ruh ka jinghikai ha ka jingialehkai karate lyngba u coach uba na katei ka skul bad u coach u la shem ba kane ka khynnah ka don ka sap ha ka jingiakhun karate/martial arts, nga sngewkmen ban ong ba lyngba ka jingiarap lang ki coach kiba ai jinghikai ïa ka bad kiba ailad ruh ïa ka khun jong nga ba kan nang kiew shakhmat ha ka martial arts”
U bah F.Lyngdoh u la iathuh shuh shuh ba ka khun jong u naduh ka por ba ka dang pule ha ka kyrdan Upper Primary bad haduh ka Higher Secondary School la ai jinghikai ïa ka bad ka la ju leit ban ïa shimbynta ha ki district level kiba ha Karnataka bad ka ju ioh rah ïa ka jingjop man ka por, dang myn ha u bnai rymphang ruh jong une u snem 2025 ka dang leit iashimbynta ha kawei ka rynsan iakhun karate kaba don ha karnataka bad ka la poi sha ka thong.
U bah F.Lyngdoh u la pynpaw ka jingsngewnguh ïa ki coach kiba ju ai jinghikai ïa ka ha ka martial arts bad u kyrpad bad khmihlynti ruh ba ki nongshong shnong jong ka khliehriat East, ki heh jong ka tnat Sports ba kin wan ban ai mynsiem lem ïa ka, ban ai ki jingsneng jingkraw ïa ka khun jong u ba kan ioh ruh ka lad ba kan mihkhmat na ka jylla la jong ka jylla Meghalaya bad ba kan ioh ruh ka lad ban mihkhmat na ka ri India, u kyrpad ïa ka District Sports Officer jong ka East Jaiñtia Hills District ba kan ai mynsiem lem bad ai ki lad jingiarap kum ka lad ka lynti katba lah na ka liang ka tnat Sport ban kyntiew shuh shuh ïa ka Elad Shylla.