SHILLONG, Lber 20: Ka kynhun ïalehkai phutbol ki shynrang jong ka ri Bangladesh ka la wanpoi ha nongbah Shillong na Kolkata ha ka sngi Palei ban ïakhun ïa ka jingïalehkai kaba nyngkong jong ka shabar nala ïing ha ka AFC Asian Cup 2027 Qualifiers pyrshah ïa ka India ha ka 25 tarik u Lber.
Kane ka kynhun ka la mih na Dhaka ban leit sha Kolkata ha ka por 9 baje mynstep ha ka sngi Palei bad ki la poi ha Kad liengsuiñ Shillong ha Umroi ka por 4 baje janmiet hadien ba ki la ap katto katne kynta ha kad liengsuiñ ha Kolkata.
La pdiang sngewbha ïa katei ka kynhun da ki nongïalam jong ka Meghalaya Football Association (MFA) ba kynthup ïa u Vice President, u Bah Cliff R. Nongrum, u Joint Secretary D.L. Nongbri, Treasurer Prosper Warjri, bad u Freddy Kharpran.
Ka jingwanpoi jong ka kynhun ïalehkai phutbol ka Bangladesh ka la khring ïa kiba ieid bad sngewtynnat ïa ka phutbol, khamtam eh ka jingshah kynthup jong u Hamza Dewan Choudhury ha katei ka kynhun, uba long uwei na ki rangïalehkai barim jong ka klob Leicester City. U Hamza, uba mih madan na katei ka klob ha ka Premier League, ka Leicester City ha ka samoi lehkai jong u snem 2023-24 shuwa ban ai wai sha ka Sheffield United, udei uwei na ki rangïalehkai ba kongsan ba mihkhmat ïa ka Bangladesh ha kine ki jingïakhun ban wan.
Watla ka kynhun ïalehkai jong ka Bangladesh ka la wanpoi ha ka jaka ban pynlong ka jingïalehkai, ha Shillong, hynrei u coach ka kynhun, u Javier Cabrera um pat shym la pynthikna ïa ki 23-ngut ki dkhot ba pura jong ka kynhun.
Katkum ki tyllong khubor, la pyntbit bad hikai ïa u Hamza Choudhury ha ka Leicester City Academy, uba la ïasoh ha ka rta ba dang khynnah, kata 7 snem. Katba u nang san ha ka jingïalehkai phutbol, u la shah shim wai haka Burton Albion shuwa ban wanphai biang bad ka Leicester City, ha kaba u la mih madan 100 tylli ki jingïalehkai naduh u snem 2017. Ka jingjop kaba khraw tam jong u bad ka Leicester City ka dei ha u snem 2021 ha ka por ba rah ïa ka FA Cup.
U Hamza u la mihkhmat ruh ïa ka England ha ka kyrdan U-21. Hynrei, ha u snem 2024, hadien ba u la ïoh jingithuh kum u nongshong shnong ka ri Bangladesh, u la rai ban mihkhmat ïa kane ka ri ha ki lympung ïalehkai phutbol bar ri.
Ha kane ka AFC Asian Cup qualifiers ba mynta, ka kynhun India ka la shah pynngat ha ka Group C ryngkat ka Bangladesh, Hong Kong, bad ka Singapore.
Ka jingïakhun ban wan hapdeng ka India bad ka Bangladesh la khmih lynti ba kan long ka jingïakhun kaba itynnad bha, ha kaba kan khring ïa ki riew ieid phutbol na kylleng ka thaiñ.
